18.05.2026 | 16:03
Ապօրինի ձերբակալությունը, որին հաջորդել է ինքնասպանություն, հանցագործություն է
Հանրային սննդի ոլորտի ընկերությունների հետ քննարկվել են շրջանառության հարկի հարկման նոր շեմի հետ կապված խնդիրները
Տնտեսություն
27.09.2018 | 15:53
ՀՀ տնտեսական զարգացման և ներդրումների նախարարությունում կազմակերպվել էր հանդիպում՝ շրջանառության հարկի հարկման նոր շեմի հետ կապված խնդիրների քննարկման նպատակով։ Հանդիպմանը մասնակցել են հանրային սննդի ոլորտում գործող մոտ 22 ընկերությունների ներկայացուցիչներ։
ՀՀ տնտեսական զարգացման և ներդրումների նախարար Արծվիկ Մինասյանը ողջունել է հանդիպման մասնակիցներին, նշել, որ մեծապես կարևորում է պետություն-մասնավոր հատված համագործակցության շրջանակներում փոխադարձ վստահության և գործընկերության գործելաոճը և մաղթել արդյունավետ քննարկում։
Այնուհետև տնտեսական զարգացման և ներդրումների նախարարի տեղակալ Հակոբ Ավագյանն, անդրադառնալով շրջանառության հարկի հարկման շեմի փոփոխությունների հետ կապված հարցերին՝ հանդիպման մասնակիցներին առաջարկել է ներկայացնել իրենց մտահոգություններն ու առաջարկությունները։
Կրկնվող խնդիրներից են եղել շրջանառության հարկի հարկման ներկայիս գործող շեմի դրույքաչափը, գյուղմթերքի փաստաթղթավորման գործընթացը, հին սերնդի ՀԴՄ-երը և այլն։
Հակոբ Ավագյանը կարևորել է ընկերությունների կողմից ներկայացված խնդիրների լուծման անհրաժեշտությունը և խնդիրներն առավել հստակ պատկերացնելու համար առաջարկել իրականացնել դիտանցում։ Արդյունքները կուսումնասիրվեն և կամփոփվեն, այնուհետև կիրականացվեն աշխատանքներ խնդիրների առավել արդյունավետ լուծման ուղղությամբ։
Հանդիպման մասնակիցները պատրաստակամություն են հայտնել մասնակցելու դիտանցմանը։
