08.09.2026 | 23:30
Պապիկյանը այցելել է ՊՆ ուսումնական կենտրոն, հրամկազմին տրվել են մի շարք հանձնարարականներ
Թուրքական ակումբը ցանկացել է 10 մլն եվրոյով գնել Էդուարդ Սպերցյանի տրանսֆերը
Քաղաքականություն
14.02.2025 | 15:05
Հայաստանի ազգային հավաքականի և ռուսական «Կրասնոդար» ակումբի կիսապաշտպան Էդուարդ Սպերցյանին ցանկացել է ձեռք բերել Թուրքիայի բարձրագույն խումբը ներկայացնող «Տրաբզոնսպոր» ֆուտբոլային ակումբը։ Այս մասին հայտնում են թուրքական լրատվամիջոցները։
«Տրաբզոնսպորը» հունվարին առաջարկ է արել «Կրասնոդար»-ին հայ խաղացող Էդուարդ Սպերցյանի հետ կապված, սակայն տրանսֆերը չի կայացել, իբր, քաղաքական պատճառներով։
Նշվում է, թե «Կրասնոդարը» ընդունել է թուրքական ակումբի ավելի քան 10 միլիոն եվրոյի առաջարկը՝ ներառյալ բոնուսները և հետագայում վաճառելու իրավունքը խաղացողի համար, որը երկար ժամանակ ցանկանում է գնալ Եվրոպա։ Ակումբը նաև թույլ է տվել Սպերցյանին հանդիպել «Տրաբզոնսպորի» հետ։
Լրատվամիջոցը նշում է, թե ֆուտբոլիստն այդ հարցը, իբր, քննարկել է Հայաստանի ֆուտբոլի ֆեդերացիայի ղեկավարության և ազգային հավաքականի մարզիչ Սուրեն Չախալյանի հետ, որը տեղափոխությանը դեմ է հանդես եկել։
Հավելենք, որ Հայաստանի ֆուտբոլի հավաքականը գլխավոր մարզիչ չունի։ Սուրեն Չախալյանը նոյեմբերին նշանակվել էր մարզչի ժամանակավոր պաշտոնակատար, որի գլխավորությամբ հավաքականը երկու հանդիպում է անցկացրել։
Բացի այդ՝ Transfermarkt ինտերնետային պորտալում ներկայացված տեղեկատվության համաձայն՝ հայ ֆուտբոլիստի շուկայական արժեքը կազմում է 20 միլիոն եվրո։ «Կրասնորդար»-ն ավելի վաղ մերժել էր եվրոպական մի շարք ակումբների առաջարկները Սպերցյանի վերաբերյալ, որոնք գերազանցում են թուրքական ակումբի ենթադրյալ առաջարկը։
Թարգմանությունը՝ Էմմա Չոբանյանի
