Քաղաքականություն
13.02.2025 | 12:34
Չինացի պաշտոնյաները ԱՄՆ-ին առաջարկ են ուղարկել ՌԴ և ԱՄՆ նախագահներ Վլադիմիր Պուտինի ու Դոնալդ Թրամփի հանդիպում անցկացնելու մասին, գրում է The Wall Street Journal-ը՝ հղում անելով Պեկինի և Վաշինգտոնի աղբյուրներին։
Միաժամանակ, ըստ պարբերականի, հանդիպմանը Ուկրաինայի նախագահ Վլադիմիր Զելենսկիի մասնակցությունը չի սպասվում։
Չինաստանը նաև պատրաստակամություն է հայտնել աջակցել հնարավոր հրադադարից հետո խաղաղապահ ջանքերին։
Սպիտակ տան աղբյուրը WSJ-ին հայտնել է, որ Չինաստանի առաջարկը թերահավատությամբ է ընդունվել ԱՄՆ-ում ու Եվրոպայում։ Զրուցակիցն ընդգծել է, որ Պեկինի առաջարկած հանդիպումը «բացարձակ անիրատեսական է»։ Չինական առաջարկը, ըստ հրապարակման, արտացոլում է նախագահ Սի Ցզինպինի ցանկությունը՝ բանակցություններ վարել Թրամփի հետ՝ կանխելու ամերիկյան մաքսատուրքերը։
Միևնույն ժամանակ, Չինաստանի ղեկավարը չի ցանկանում, որ հակամարտության կարգավորման հարցում որևէ օգնություն սպառնալիք դառնա Մոսկվայի և Պեկինի սերտ հարաբերությունների համար, նշում են Չինաստանի դիրքորոշմանը ծանոթ աղբյուրները։
Թարգմանությունը՝ Տաթև Ֆռանգյանի
