19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
«Վրացական երազանք»-ը դադարեցնում է ԵԽԽՎ-ում աշխատանքը
Քաղաքականություն
30.01.2025 | 11:55
Վրաստանի իշխող «Վրացական երազանք» կուսակցությունը դադարեցնում է աշխատանքը Եվրոպայի խորհրդի {որհրդարանական վեհաժողովում (ԵԽԽՎ)։ Այս մասին հայտարարել է կառույցում վրացական պատվիրակության ղեկավար Թեա Ծուլուկիանին, փոխանցում է Эхо Кавказа-ն։
Նա ասել է, որ Վրաստանի վերաբերյալ ընդունված բանաձևի պայմաններն ու վերապահումներն «անընդունելի, անարդար ու անհիմն են»։
Ծուլուկիանիի խոսքով՝ նոր ընտրություններ նշանակելու վերաբերյալ ԵԽԽՎ պահանջը «խախտում է Վրաստանի ինքնիշխանությունը և անտեսում ավելի քան 1,120,000 ընտրողների կամքը, որոնք քվեարկել են «Վրացական երազանքի» օգտին։
«Մեր կողմից այս վերապահումն ընդունելը հավասարազոր է մեր ընտրազանգվածին դավաճանելուն։ Մենք՝ Ստրասբուրգում Վրաստանի խորհրդարանական պատվիրակության անդամներս, դադարեցնում ենք մեր աշխատանքը ԵԽԽՎ-ում»,- ասել է Ծուլուկիանին՝ հավելելով, որ դա «Վրացական երազանքի» թիմային որոշումն է։
Միաժամանակ, նա նշել է, որ Վրաստանը մնում է Եվրոպայի խորհրդի անդամ և կվերսկսի աշխատանքը ԵԽԽՎ-ում, «երբ անարդար վերաբերմունքը փոխվի և շանտաժը դադարի»։
ԵԽԽՎ-ն հունվարի 29-ին բանաձև է ընդունել, որով կոչ է անում Վրաստանի իշխանություններին ազատ արձակել բոլոր քաղբանտարկյալներին, նոր խորհրդարանական ընտրությունների ամսաթիվ նշանակել մինչև այս տարվա ապրիլը և վերանայել ընդունված վիճահարույց օրենքները։ Այն հաստատում է վրացական պատվիրակության սահմանափակ լիազորությունները ընթացիկ նստաշրջանի համար, սակայն որոշումը կվերանայվի ապրիլին, եթե նշված պայմանները չկատարվեն։
Թարգմանությունը՝ Էմմա Չոբանյանի
