05.12.2025 | 23:32
ԱԱ․ Բաչկովը հաղթել է ժամկետից շուտ, Մաշակարյանը և Հովհաննիսյանը ևս շարժվում են առաջ
Ադրբեջանում ՏԻՄ ընտրություններն ուղեկցվում են զանգվածային ընտրախախտումներով․ ՏԵՍԱՆՅՈՒԹ
Քաղաքականություն
29.01.2025 | 15:23
Ադրբեջանում անցկացվող տեղական ինքնակառավարական մարմինների (ՏԻՄ) ընտրություններում զանգվածային ընտրախախտումներ են գրանցվել։ Այս մասին ահազանգում է Նասիմիի շրջանի մունիցիպալ խորհրդի անդամության թեկնածու, ակտիվիստ Ջամիլա Ալիշևան։
Նա ֆեյսբուքյան իր էջում հրապարակել է ընտրատեղամասերի տեսախցիկներից վերցված տեսանյութեր, որոնցում երևում է, թե ինչպես են նույն մարդիկ քվեարկում Նասիմի-Սաբայիլի 23-րդ ընտրատարածքի ընտրատեղամասերում: Թիվ 14 ընտրատեղամասում քվեաթերթիկները կույտերով լցրել են քվեատուփերի մեջ։
Ակտիվիստ Ահմադ Մամեդլին էլ, որը դիտորդ է Նասիմի-Սաբայիլի ընտրատարածքի թիվ 32 ընտրատեղամասում, հայտարարել է, որ իրեն սպառնացել են սպանել։
«Այստեղ մի մարդ պնդում է, որ ես տեսանկարահանել եմ իր ընտանիքի անդամին, քրոջը, թե ինչպես են ընտրակեղծիքներ անում և քվեարկության կարուսելային սխեմա օգտագործում։ Նա սպառնաց ինձ սպանել։ Նա նույնիսկ ասաց, որ ուզում է մեկին ուղարկել ինձ դանակահարելու։ Ես հայտարարեցի, որ չեմ դադարեցնի հսկողությունը՝ չնայած սպառնալիքներին։ Ես այստեղ շարունակում եմ իմ դիտորդական գործունեությունը և դրա համար ինձ սպառնում են։ Եթե ինձ հետ ինչ-որ բան պատահի մինչև ընտրությունների ավարտը, պատասխանատվությունը կրում են այստեղ քաոս ստեղծած իշխանական դիտորդները, ինչպես նաև տեղամասի անդամներն ու նախագահը»,- հայտարարել է Մամեդլին սոցցանցերում հրապարակած տեսանյութում։
Հավելենք, որ Ադրբեջան ՏԻՄ ընտրություններն ընթանում են 118 ընտրատարածք ընդգրկող 5846 ընտրատեղամասերում։ 685 մունիցիպալիտետներում 8071 տեղի համար պայքարում է 16,092 թեկնածու։
Թարգմանությունը՝ Էմմա Չոբանյանի
