Ժանգոտած, անպիտան զենք երբևէ չենք գնել. Սեյրան Օհանյանը` Փաշինյանի հայտարարության մասին․ ՏԵՍԱՆՅՈՒԹ

«Մենք երբևիցե ժանգոտած, անպիտան զենք չենք գնել, երբևիցե չենք ունեցել սպառազինություն, որն անպիտան է եղել մարտի դաշտում»,- «Եռաբլուր» զինվորական պանթեոնում լրագրողների հետ զրույցում ասաց ԱԺ «Հայաստան» խմբակցության ղեկավար, Պաշտպանության նախկին նախարար Սեյրան Օհանյանը՝ անդրադառնալով Նիկոլ Փաշինյանի այն հայտարարությանը, թե երբ Արարատի խոսույթով ենք մոտենում բանակին, հազիվ ժանգոտած, ժամկետանց, ոչ պիտանի զենքեր կվաճառեն։

«Մենք ընդհակառակը, տարիներ ի վեր ռազմատեխնիկական համագործակցության շրջանակներում ոչ միայն գնել ենք սպառազինություն, ռազմական տեխնիկա, նաև կարողացել ենք այն ձեռք բերել և ՀԱՊԿ ցածր գներով, և նաև մեր ռազմավարական գործընկերոջից ենք ստացել սպառազինություն և ռազմական տեխնիկա, բավականին մեծ քանակությամբ և բավականին նաև առաջատար սպառազինության միջոցներ։ Փաշինյանը թող ի՛նքը պատասխան տա, որ այն սպառազինությունը և ռազմական տեխնիկան, որ եղել է հայկական բանակի ձեռքին, ու՞ր է հիմա, ինչո՞ւ ինքը չկարողացավ արագ տիրապետել կառավարման հիմունքներին՝ օգտագործելով մեր պետության ամբողջ ներուժը և նաև կառավարման համակարգում գործող բոլոր օրգաններին, որպեսզի ճիշտ գնահատի ռազմաքաղաքական իրավիճակը։ Տարիներ ի վեր մենք հաղթանակի ենք հասել միասնության գաղափարի ներքո, այնտեղ, որտեղ միասնական ենք եղել, միշտ հաջողություններ ենք ունեցել։ Իր կառավարման ընթացքում այն միասնականությունը, որը որ գոյություն ուներ, այն միասնականությունը, որը որ արտահայտվել էր բոլոր մարտական գործողությունների ժամանակ, պարզապես քայքայվեց, դրա համար ի՛նքը թող պատասխան տա»,- նշեց Պաշտպանության նախկին նախարարը։

Մանրամասները՝ տեսանյութում։