Քաղաքականություն
20.01.2025 | 15:55
Իրանը գտնվում է անբարենպաստ վիճակում Իսրայելի վարչապետ Բենիամին Նեթանյահուի որոշումների շնորհիվ, հայտարարել է ԱՄՆ նորընտիր նախագահ Դոնալդ Թրամփի ազգային անվտանգության հարցերով խորհրդական Մայք Ուոլցը։ Նա նշել է, որ հաջորդ նախագահի վարչակազմը պետք է «որոշում կայացնի Իրանի վերաբերյալ» առաջիկա մեկ ամսվա ընթացքում։
Ուոլցի խոսքով՝ Իրանը թուլացել է, քանի որ Իսրայելը հաղթել է Թեհրանի աջակցությունը վայելող խմբավորումներին։ Նա հիշեցրել է «Հըզբոլլահի» առաջնորդ Հասան Նասրալլայի սպանությունը, Սիրիայում Բաշար ալ-Ասադի կառավարության տապալումը և ՀԱՄԱՍ-ի «մեկուսացումը»։ Մասնավորապես, նրա կարծիքով, դա է պատճառը, որ ՀԱՄԱՍ-ը հրադադարի համաձայնագիր է կնքել Իսրայելի հետ։
«Եվ հիմա Իրանի հակաօդային պաշտպանությունը ոչնչացված է։ Այսպիսով, հիմնական որոշումները կայացնելու պահն է: Եվ մենք դա կանենք հաջորդ ամսվա ընթացքում», – ասել է Ուոլցը CBS News-ին:
Իր հերթին, հանրապետական սենատոր Լինդսի Գրեմն էլ Politico-ի փոխանցմամբ՝ հայտարարել է, որ ԱՄՆ նորընտիր նախագահ Դոնալդ Թրամփը պետք է Իսրայելին առաջարկի Վաշինգտոնի աջակցությամբ հարվածել Իրանի միջուկային օբյեկտներին։
«Այնպես որ հաջորդ թեման, որը ես կքննարկեմ նախագահ Թրամփի հետ, այն է, թե ինչպես օգտագործել այս պահը իրանական միջուկային ծրագիրը ոչնչացնելու համար, քանի որ այն բացահայտվել է», – նշել է ամերիկացի սենատորը։
Bloomberg-ն էլ հայտնել էր, որ Դոնալդ Թրամփի վարչակազմը ծրագրեր ունի ուժեղացնելու ճնշումն Իրանի կառավարության վրա։ ԱՄՆ նախագահ Ջո Բայդենը արտաքին քաղաքականության վերաբերյալ իր վերջին ելույթի ժամանակ ասել է, որ Իրանի հակաօդային պաշտպանությունը «ավերակների մեջ է», իսկ հանրապետության տնտեսությունը «սարսափելի վիճակում է»։
Թարգմանությունը՝ Տաթև Ֆռանգյանի
