19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
Երբեք խոսք չի գնացել ՀՀ տարածքում արտատարածքային միջանցքների ստեղծման մասին․ Զախարովա․ ՏԵՍԱՆՅՈՒԹ
Քաղաքականություն
16.01.2025 | 16:06
Ռուսական հեռուստատեսությամբ լրագրողական հայտարարություններին Հայաստանի արձագանքը ՌԴ ԱԳՆ-ի տարակուսանքն է հարուցել։ Այս մասին իր ամենշաբաթյա ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
«Արձագանքը տարակուսելի է, քանի որ խոսքը վերաբերում է լրագրողի հայտարարությանը։ Եվ մենք միշտ Երեւանից լսել ենք, որ նրանք հավատարիմ են խոսքի ազատությանը»,- ասել է Զախարովան՝ նշելով, թե ՌԴ պաշտոնական դիրքորոշումը ՀՀ իշխանություններին լավ հայտնի է։
Վերջինը մեջբերել է եռակողմ հայտարարությունից հատված ու հերթական անգամ շեշտել, որ տրանսպորտային հաղորդակցությունների նկատմամբ հսկողությունը պետք է իրականացվի Ռուսաստանի ԱԴԾ սահմանային ծառայության կողմից և կողմերի համաձայնությամբ ապահովվի Նախիջևանի Ինքնավար Հանրապետությունը Ադրբեջանի արևմտյան շրջանների հետ կապող նոր տրանսպորտային հաղորդակցությունների կառուցումը։
Զախարովան նշել է, որ հենց սա է այն տրամաբանությունը, որն ընկած է Ռուսաստանի, Ադրբեջանի և Հայաստանի փոխվարչապետների նախագահությամբ եռակողմ աշխատանքային խմբի գործունեության հիմքում։ Նրա խոսքով՝ աշխատանքային խմբի շրջանակում հնարավոր է եղել հասնել զգալի գործնական արդյունքների և մոտենալ Ադրբեջանի ու Հայաստանի միջև երկաթուղային հաղորդակցության վերականգնմանն ու կազմակերպմանը։
«Եռակողմ աշխատանքային խմբում երբեք չի քննարկվել Հայաստանում արտատարածքային միջանցքների ստեղծման հարցը։ Ընդհակառակը, պայմանավորվածություն է ձեռք բերվել, որ երկրներն ունեն ինքնիշխանություն և իրավասություն իրենց տարածքով անցնող երթուղիների նկատմամբ»,- հավելել է ՌԴ ԱԳՆ պաշտոնական ներկայացուցիչը։
Մանրամասները՝ տեսանյութում։
Տաթև Ֆռանգյան
