20.02.2026 | 14:14
Պուտինը ՌԴ ԱԳ փոխնախարարին Թուրքիայում դեսպան է նշանակել
Գերմանիայի ՊՆ ղեկավարը Կիև է ժամանել
Քաղաքականություն
14.01.2025 | 12:42
Գերմանիայի պաշտպանության նախարար Բորիս Պիստորիուսը հունվարի 14-ի առավոտյան ժամանել է Կիև՝ բանակցություններ վարելու Ուկրաինայի ղեկավարության հետ՝ ռուսական ագրեսիան հետ մղելու համար հետագա ռազմական օգնության շուրջ, գրում է DW-ի ռուսական ծառայությունը։
«Ինձ համար կարևոր է այս ուղևորությամբ ցույց տալ, որ շարունակում ենք ակտիվորեն աջակցել Ուկրաինային։ Սա ազդանշան է այն մասին, որ Գերմանիան, որպես Եվրոպայում ՆԱՏՕ-ի ամենամեծ երկիր, կանգնած է Ուկրաինայի կողքին։ Ոչ միայնակ, այլ հինգ երկրների և շատ այլ դաշնակիցների հետ միասին»,- ասել է նա Կիևում dpa գործակալությանը տված հարցազրույցում։
Երեկ երեկոյան Պիստորիուսը Վարշավայում բանակցություններ է անցկացրել Լեհաստանի, Ֆրանսիայի, Իտալիայի և Մեծ Բրիտանիայի գործընկերների հետ Կիևին հետագա աջակցության շուրջ։ Գերմանիան եվրոպական չորս խոշոր գործընկերների հետ մտադիր է մեծացնել ջանքերն Ուկրաինայի պաշտպանական արդյունաբերության ամրապնդման համար։
«Եթե լինի գումար, եթե լինեն զենք արտադրելու հզորություններ, ապա Ուկրաինան ինքն ավելի արագ կկարողանա իր զորքերին նյութեր և զենք մատակարարել»,- ասել է Պիստորիուսը Վարշավայում հանդիպմանը։
Եվրոպայի պաշտպանության նախարարների խորհրդակցությունները հնգյակի ձևաչափով կազմակերպվել են ԱՄՆ նախագահական ընտրություններում Դոնալդ Թրամփի հաղթանակից հետո՝ նպատակ ունենալով ամրապնդել եվրոպական անվտանգությունը և պաշտպանական կարողությունները։
Թրամփի երդմնակալությանն ընդառաջ անհասկանալի է մնում, թե ինչ կլինի հետո Ուկրաինային Արևմուտքի աջակցության հետ կապված։ Թրամփը բազմիցս խոսել է Ռուսաստանի նախագահ Վլադիմիր Պուտինի հետ բանակցություններ վարելու ցանկության մասին՝ ուկրաինական պատերազմն արագ ավարտելու համար, սակայն եվրոպացի դաշնակիցները տեղյակ չեն նրա կոնկրետ ծրագրերի մասին։
Ուկրաինայում մտավախություն կա, որ Թրամփը կարող է զգալիորեն կրճատել ԱՄՆ-ի օգնությունը, ինչը կհանգեցնի պատերազմում Կիևի պարտությանը։
Թարգմանությունը՝ Էմմա Չոբանյանի
