Իսրայելի բարձրաստիճան պաշտոնյաներն անվտանգային հանդիպում են անցկացրել Մերձավոր Արևելքում Թուրքիայի աճող ազդեցության վերաբերյալ

Չորեքշաբթի երեկոյան Իսրայելի պաշտպանության նախարար Իսրայել Կացը անվտանգության հատուկ խորհրդակցություն է հրավիրել Թուրքիայի վերաբերյալ։ Այս մասին The Jerusalem Post-ին հայտնել են իսրայելցի երկու պաշտոնյաներ։

Ըստ լրատվամիջոցի՝ հանդիպումը ցույց է տալիս, թե իսրայելցի պաշտոնյաները որքան են կարևորում և, գուցե, նույնիսկ վախենում, որ Սիրիայում Ասադի վարչակարգի տապալումից և «Հայաթ Թահրիր ալ-Շամի» վերելքից հետո տարածաշրջանում Թուրքիայի ազդեցության աճի հնարավորությունից։

Աղբյուրները հայտնել են, որ հանդիպմանը մասնակցել են արտաքին գործերի նախարար Գեդեոն Սաարը, շտաբի պետ, գեներալ-լեյտենանտ Հերզի Հալևին, ԱԳՆ և պաշտպանական կառույցների բարձրաստիճան պաշտոնյաները։ Նրանք նշել են, որ այն կազմակերպվել է տարածաշրջանում թուրքական ազդեցության հարցը քննարկելու և վերլուծելու՝ արդյո՞ք Իսրայելի նկատմամբ Թուրքիայի սպառնալիքի մակարդակում որևէ փոփոխություն կա, քանի որ տարածաշրջանում նրա ազդեցությունն աճել է։

Իսրայելի որոշ պաշտոնյաներ մտավախություն ունեն, որ թեև Սիրիայում Իրանի ազդեցությունը նվազել է, այժմ կլինի սուննի Թուրքիա-Սիրիա առանցքը, որը, ի վերջո, կարող է սպառնալիք դառնալ Իսրայելի համար և համագործակցել ահաբեկչական կազմակերպությունների հետ:

Երեքշաբթի Նագելի կոմիտեն իր զեկույցը ներկայացրել էր վարչապետ Բենիամին Նեթանյահուին և Կացին։ Զեկույցում ասվում է, որ «Սիրիայում Թուրքիայի միջամտության և նոր ռեժիմի հնարավոր հովանավորության պատճառով անհրաժեշտ է հաշվի առնել Թուրքիայի հետ  հարաբերությունների սրումը, որը կարող է տարածվել այլ շրջաններ»։

Զեկույցում Թուրքիան հիշատակվում է ավելի քան 10 անգամ, ինչը վկայում է Իսրայելի անհանգստության մասին՝ կապված Թուրքիայի նախագահ Ռեջեփ Թայիփ Էրդողանի՝ Իսրայելի դեմ հռետորաբանության հետ։

Լրատվամիջոցին իսրայելցի պաշտոնյան հայտնել է, որ առաջիկա օրերին Նեթանյահուն նույնպես հանդիպում կանցկացնի Թուրքիայի հարցով։

Թարգմանությունը՝ Էմմա Չոբանյանի