07.10.2026 | 15:26
«Ռոսատոմը» հաստատել է՝ հայկական ԱԷԿ-ը մինչև 2031 թվականը պատրաստ կլինի անվտանգ շահագործման
Ադրբեջանական SOCAR-ը 7 միլիարդ դոլար կներդնի Թուրքիայում
Քաղաքականություն
07.01.2025 | 21:42
Ադրբեջանի պետական նավթային SOCAR ընկերության թուրքական մասնաճյուղը նախատեսում է շուրջ 7 միլիարդ դոլար ծախսել պոլիոլեֆինի արտադրության մի քանի նոր գործարաններ հիմնելու համար՝ իր Petkim ստորաբաժանման հզորությունն ընդլայնելու նպատակով։ Այս մասին հայտարարել է SOCAR-ի Թուրքիայի մասնաճյուղի վերամշակման և նավթաքիմիական ստորաբաժանման ղեկավար Քանան Միրզաևը, գրում է Duvar-ը՝ վկայակոչելով Reuters-ին։
«2025-2026 թվականներին կպատրաստվի օբյեկտների մանրամասն ինժեներական նախագիծ (FEED), որը կպահանջի մոտ 50 միլիոն դոլար նախնական ներդրումներ»,- ասել է Միրզաևը։
Նա նշել է, որ որոշումը հաստատվել է խորհրդի դեկտեմբերյան նիստում, և նախատեսվում է, որ նախագիծը կիրականացվի առաջիկա հինգից տասը տարիների ընթացքում։
«Թուրքիան ներմուծում է իր պոլիոլեֆինների մինչև 90%-ը: Այս նախաձեռնությունը կնվազեցնի կախվածությունը ներմուծումից և կխթանի Թուրքիայի SOCAR-ի եկամուտները»,- ասել է Միրզաևը:
Ներդրումային վերջնական որոշումը սպասվում է մինչև 2026 թվականի վերջ։
Շուրջ 60 տարի առաջ հիմնադրված Petkim-ն ամբողջությամբ դարձել է SOCAR-ի սեփականությունը 2008 թվականին՝ այն բանից հետո, երբ ադրբեջանական ընկերությունը ձեռք բերեց վերահսկիչ բաժնետոմսերը 2,04 միլիարդ դոլարով: Այն շահագործում է 16 արտադրական գործարան և 2024 թվականին արտադրել է 2 միլիոն տոննա նավթաքիմիական արտադրանք՝ բավարարելով Թուրքիայի ներքին պահանջարկի 11 տոկոսը։
Հավելենք, որ պաղեստինցիների դեմ Իսրայելի ռազմական գործողությունների վերաբերյալ Թուրքիայում հասարակական բուռն բողոքից հետո երկրի Առևտրի նախարարությունը հայտարարել էր, որ Անկարան ամբողջությամբ դադարեցրել է առևտուրն Իսրայելի հետ: Այնուամենայնիվ, հայտնի է, որ երկրում գործող մի քանի խոշոր ընկերություններ շարունակում են իրենց կապերը իսրայելական կազմակերպությունների հետ:
SOCAR-ն էներգակիրներ է մատակարարում Իսրայելին Բաքու-Թբիլիսի-Ջեյհան խողովակաշարով, և մի քանի պետական պաշտոնյաներ հանդիպել են ընկերության ներկայացուցիչների հետ շարունակվող բողոքի ակցիաների ֆոնին, թեև կառավարությունն իրեն դրսևորել է որպես պաղեստինամետ: Պաղեստինամետ մի քանի ցուցարարներ էլ ձերբակալվել են SOCAR-ի դեմ բողոքի ակցիաների ժամանակ։
Թարգմանությունը՝ Էմմա Չոբանյանի
