ԱՄՆ-ը ժամանակավորապես մեղմացրել է Սիրիայի նկատմամբ պատժամիջոցները

ԱՄՆ-ը ժամանակավորապես մեղմացրել է պատժամիջոցները Սիրիայում կառավարական կառույցների հետ գործարքների համար Բաշար Ասադի կառավարման ավարտից հետո՝ մարդասիրական օգնության հոսքնն ապահովելու համար։ Սա նաև թույլ է տալիս որոշ էներգետիկ գործարքներ և անձնական դրամական փոխանցումներ կատարել Սիրիա մինչև հուլիսի 7-ը: Գործողությունը չի վերացրել որևէ պատժամիջոցներ, գրում է Reuters-ը։

Սիրիան տուժում է էլեկտրաէներգիայի խիստ պակասից, քանի որ շատ շրջաններում պետության կողմից մատակարարվող էլեկտրաէներգիան հասանելի է օրական ընդամենը երկու-երեք ժամ: Ժամանակավոր կառավարությունը նշել է, որ նպատակ ունի երկու ամսվա ընթացքում օրական մինչև ութ ժամ էլեկտրաէներգիա ապահովել:

ԱՄՆ ֆինանսների նախարարությունը հայտարարել է, որ այս քայլը նպատակ ունի «օգնել, որպեսզի պատժամիջոցները չխանգարեն հիմնական ծառայություններին և կառավարման գործառույթների շարունակականությանը Սիրիայում, ներառյալ էլեկտրաէներգիայի, ջրի մատակարարումն ու սանիտարական մաքրման ապահովումը»։

Եվրամիությունը, ԱՄՆ-ը, Մեծ Բրիտանիան և այլ կառավարություններ կոշտ պատժամիջոցներ էին սահմանել Սիրիայի դեմ այն ​​բանից հետո, երբ 2011 թվականին Ասադի կողմից ժողովրդավարության կողմնակիցների բողոքի ակցիաները ճնշվել էին, որոնք վերածվեցին քաղաքացիական պատերազմի։ Թեև Վաշինգտոնի այս քայլը «թույլ է տալիս գործարքներ կատարել Սիրիայում կառավարական կառույցների հետ, նույնիսկ եթե տվյալ անհատը բարձր պաշտոն է զբաղեցնում», այն չի թույլատրում որևէ գործարք, որը ներառում է ռազմական կամ հետախուզական ծառայությունները։

ԱՄՆ-ի պատժամիջոցներն Ասադի և նրա գործընկերների, սիրիական կառավարության, Սիրիայի Կենտրոնական բանկի և HTS-ի նկատմամբ շարունակում են ուժի մեջ մնալ։

Ամերիկացի պաշտոնյան անանունության պայմանով լրատվամիջոցին ասել է, որ  այդ քայլը ցույց է տալիս բարի կամք սիրիացի ժողովրդի, այլ ոչ թե նոր իսլամիստական ​​կառավարության նկատմամբ:

«Բաշար Ասադի դաժան և ռեպրեսիվ կառավարման ավարտը, որին աջակցում են Ռուսաստանը և Իրանը, եզակի հնարավորություն է ընձեռում Սիրիային և նրա ժողովրդին։ Անցումային այս ժամանակահատվածում գանձապետարանը կշարունակի աջակցել Սիրիայում մարդասիրական օգնությանը և պատասխանատու կառավարմանը»,- ասվում է ֆինանսների փոխնախարար Ուոլի Ադեյեմոյի հայտարարության մեջ:

Սիրիայի ժամանակավոր կառավարության առևտրի նախարար Մահեր Խալիլ ալ-Հասանը մինչ այս նշել էր, որ երկիրը չի կարողանում գործարքներ կնքել վառելիքի, ցորենի կամ այլ կարևոր ապրանքների ներկրման համար՝ ԱՄՆ-ի խիստ պատժամիջոցների պատճառով, չնայած շատ երկրներ, այդ թվում՝ Պարսից ծոցի արաբական երկրները, ցանկանում են դա անել։ Նա ասել էր, որ Սիրիային «աղետ» է սպասվում, եթե պատժամիջոցները շուտով չսառեցվեն կամ չչեղարկվեն։

Թարգմանությունը՝ Էմմա Չոբանյանի