17.05.2026 | 16:12
Խափանում մետրոպոլիտենում․ այն կաշխատի մեկ գծանի երկկողմանի երթևեկությամբ
ԱՄՆ Կոնգրեսը հաստատել է նախագահական ընտրություններում Թրամփի հաղթանակը
Քաղաքականություն
07.01.2025 | 11:05
ԱՄՆ Կոնգրեսը հաստատել է նորընտիր նախագահ Դոնալդ Թրամփի հաղթանակը 2024 թվականի ընտրություններում։ Այս մասին հայտնում է DW-ի ռուսական ծառայությունը։
ԱՄՆ փոխնախագահ Քամալա Հարիսը, որը պարտվել էր ընտրություններում Թրամփին, պաշտոնական արդյունքը հայտարարել է Վաշինգտոնում Սենատի և Ներկայացուցիչների պալատի համատեղ նիստում։
Օրենսդիրները նիստին մասնակցել են խիստ անվտանգության պայմաններում. այդ միջոցառումները հիշեցրել են 2021 թվականի հունվարի 6-ին Ջո Բայդենի հաղթանակից հետո Կապիտոլիումի գրոհը: Շենքի շրջակայքը այս տարի շրջափակված է եղել պաշտպանիչ պատնեշներով, ոստիկանները այն հսկել են ողջ պարագծով:
Հայտարարվել են առանձին նահանգներից ընտրիչների հաշվարկված ընտրական ձայները՝ 312 Թրամփի և 226՝ Հարիսի օգտին։ Սա վերջին ընթացակարգային քայլն է նոր նախագահի երդմնակալությունից առաջ։ Նիստին մասնակցել է նորընտիր փոխնախագահ Ջեյմս Դեյվիդ Վենսը։ Օհայոյի հանրապետական սենատորի նախկին գործընկերները շնորհավորել ու լուսանկարվել են նրա հետ։
Թրամփն իր սոցիալական ցանցի էջում գրել է, որ Կոնգրեսը հաստատում է ընտրություններում իր «մեծ» հաղթանակը և տեղի ունեցածն անվանել է «պատմության կարևոր պահ»։
Թարգմանությունը՝ Էմմա Չոբանյանի
