24.12.2024 | 21:15
Փաշինյանը մերժվեց նախկիններից․ ինչու չկայացավ բանավեճ Տեր-Պետրոսյանի, Քոչարյանի ու Սարգսյանի միջև. ՏԵՍԱՆՅՈՒԹ
Թուրքիան երեք շաբաթվա ընթացքում քրդերենով 120 գիրք է արգելել
Քաղաքականություն
23.12.2024 | 23:04
Քուրդ հրատարակիչների ասոցիացիան (YEWKURD) hայտարարել է, որ Թուրքիայի իշխանությունները վերջին երեք շաբաթվա ընթացքում արգելել են քրդերենով 120 գիրք, ամսագիր, թերթ կամ այլ հրատարակություն՝ կապված քրդերի հետ։ Արգելված ստեղծագործությունների թվում են Քրդական տարածաշրջանային կառավարության հիմնադիր Մուստաֆա Բարզանիի և սոցիոլոգ Իսմայիլ Բեշիքչիի մասին գրքերը։ Քրդական Rudaw-ի հետ զրույցում YEWKURD-ի պաշտոնյա Ջիհաթ Ռոջհըլաթը քննադատել է արգելքները։
«Նույնիսկ 1990-ականներին այսքան գրքեր միանգամից չէին արգելվում։ Վերջերս արգելվել է 120 գիրք։ Սա արժանի է Գինեսի ռեկորդների գրքի»,- ասել է նա:
Ռոջհըլաթը հավելել է, որ այդ արգելքները, թուրքական օրենսդրության համաձայն, օրինական չեն, քանի որ Մամուլի մասին օրենքի 3-րդ հոդվածը սահմանում է, որ գրքերը կամ ամսագրերը չեն կարող արգելվել առանց ապացույցների: Տուժածների թվում է «Ավեստա» հրատարակչությունը, որի հրատարակած 14 գիրք կարճ ժամանակում արգելվել է։
«Գրքերից մեկը քրդական դիցաբանության մասին է, բայց այնտեղ քրդերի մասին խոսք անգամ չկա։ Ավելին, դա առաջին հրատարակությունը չէր, որն արգելվեց, երրորդն էր։ Հրատարակիչներին տրվում է վեց ամիս ժամանակ՝ գրքերը փոփոխելու համար։ Խուզարկում են տները, գրքեր են նայում, հետո արգելքներ են դնում»,- ասել է «Ավեստա»-ի ներկայացուցիչ Սոնգյուլ Քեշքինը։
Դեկտեմբերի սկզբին թուրքական ոստիկանությունը գրքեր է առգրավել հարավարևելյան Դիարբեքիր նահանգում կազմակերպված գրքի տոնավաճառում, ներառյալ՝ քրդերեն Dildarê Serkeftinê (Աֆրինի դիմադրության օրագիրը) գիրքը, որը պատմում է Սիրիայի Աֆրին նահանգում քաղաքացիական պատերազմի մասին:
Թարգմանությունը՝ Էմմա Չոբանյանի
