30.04.2026 | 21:27
Այսօրվա փաստաթղթի ստորագրումը նշանակալի քայլ է գյուղական զարգացման ամրապնդման ճանապարհին. Պապոյան
ՆԱՏՕ-ի գլխավոր քարտուղարը Զելենսկիին խնդրել է դադարեցնել Շոլցի հասցեին քննադատությունները
Քաղաքականություն
23.12.2024 | 14:24
ՆԱՏՕ-ի գլխավոր քարտուղար Մարկ Ռյուտեն հայտարարել է, որ երբեմն Ուկրաինայի նախագահ Վլադիմիր Զելենսկիի սուր քննադատությունը Գերմանիայի կանցլեր Օլաֆ Շոլցի հասցեին անհիմն է։ Այս մասին նա ասել է dpa-ին տված հարցազրույցում, գրում է «Европейская правда»-ն։
«Ես հաճախ եմ ասել Զելենսկիին, որ նա պետք է դադարի քննադատել Շոլցին, քանի որ կարծում եմ՝ դա անարդար է»,- ասել է Ռյուտեն։
Նա նշել է, որ այն, ինչ Շոլցն արել է Ուկրաինայի համար, տպավորիչ է։ ՆԱՏՕ-ի գլխավոր քարտուղարի խոսքով՝ կանցլերը նպաստել է, որ Գերմանիան ԱՄՆ-ից հետո երկրորդ տեղն է զբաղեցնում Ուկրաինային ռազմական աջակցություն ցուցաբերելու առումով։ Դա ձեռքբերում է, որի համար Կիևը կարող է նաև երախտապարտ լինել, հավելել է ՆԱՏՕ-ի ղեկավարը։
Միաժամանակ, Ռյուտեն հասկացրել է, որ ի տարբերություն Շոլցի՝ Ուկրաինային կմատակարարեր Taurus թևավոր հրթիռներ և որևէ սահմանափակում չէր մտցնի դրանց կիրառման համար։
«Ընդհանուր առմամբ, մենք գիտենք, որ նման հնարավորությունները շատ կարևոր են Ուկրաինայի համար»,- ասել է Նիդերլանդների նախկին վարչապետը՝ հավելելով, որ ինքը չէ, որ պետք է որոշի, թե կոնկրետ ինչ պետք է մատակարարեն դաշնակիցները։
Զելենսկին վերջերս քննադատել էր Շոլցին, այդ թվում՝ այն բանի համար, որ նա հեռախոսազրույց է ունեցել Ռուսաստանի նախագահ Վլադիմիր Պուտինի հետ՝ Ուկրաինայի նախագահի կամքին հակառակ։ Նա նաև բազմիցս հրապարակավ արտահայտել է իր դժգոհությունը կանցլերի կողմից Taurus թևավոր հրթիռներ մատակարարելուց հրաժարվելու վերաբերյալ: Գերմանիայի կանցլերը հրաժարվում է Ուկրաինային այդ հեռահար հրթիռները տրամադրել։
Թարգմանությունը՝ Էմմա Չոբանյանի
