Քաղաքականություն
06.12.2024 | 21:16
Մալթայում ԵԱՀԿ երկրների ԱԳ նախարարների խորհրդի նիստի շրջանակում ԱՄՆ պետքարտուղար Էնթոնի Բլինքենը հանդիպել է Ադրբեջանի, Բելառուսի, Ղրղզստանի, Ռուսաստանի և Ուկրաինայի քաղաքացիական հասարակության ներկայացուցիչների հետ։
Ադրբեջանի քաղհասարակությունը ներկայացրել է քաղաքական էմիգրանտ, իրավապաշտպան Էմին Հուսեյնովը։ Նա ադրբեջանական լրատվամիջոցներին հայտնել է, որ հանդիպման ընթացքում պատմել է Ադրբեջանում մարդու իրավունքների վիճակի վատթարացման, ակտիվիստների և լրագրողների ձերբակալությունների, իրավապաշտպան Ռուֆաթ Սաֆարովի վերջին կալանավորման մասին։
Հուսեյնովի խոսքով՝ Բլինքենը տեղյակ է եղել Սաֆարովի կալանավորումից և նշել է, որ Վաշինգտոնում տագնապով են հետևում Ադրբեջանում անարդարացիորեն ձերբակալված անձանց գործերին։ Նա նշել է, որ իրավապաշտպանների և լրագրողների ավանդական ձերբակալությունների հետ մեկտեղ՝ Ադրբեջանում նոր միտում է ի հայտ եկել՝ հետապնդում են նաև «հակապատերազմական ակտիվիստներին»:
Հուսեյնովը հանդիպմանն ասել է, որ անհրաժեշտ է ուժեղացնել ԱՄՆ ինստիտուցիոնալ և քաղաքական աջակցությունն Ադրբեջանի քաղաքացիական հասարակությանն ինչպես երկրի ներսում, այնպես էլ արտերկրում: Դա կարևոր է մարդու իրավունքների պաշտպանության և ժողովրդավարական արժեքների առաջմղմանն ուղղված ջանքերի արդյունավետության բարձրացման համար: Հուսեյնովը նաև Բլինքենին խնդրել է ուշադրություն հրավիրել Եվրամիության երկրների կողմից Ադրբեջանում մարդու իրավունքներին աջակցելու մեծացման անհրաժեշտության վրա։
Ըստ համացանցում տարածված լուսանկարների՝ հանդիպմանը մասնակցել է նաև ԱՄՆ պետքարտուղարի Եվրոպայի և Եվրասիայի հարցերով օգնական Ջեյմս Օ՛Բրայենը։
Հավելենք, որ ավելի վաղ ԱՄՆ Պետքարտուղարությունն իր մտահոգությունն էր հայտնել հայտնի իրավապաշտպան Ռուֆաթ Սաֆարովի ձերբակալման կապակցությամբ։
Թարգմանությունը՝ Էմմա Չոբանյանի
