Քաղաքականություն
05.12.2024 | 22:53
Թուրքիայի ՊՆ մամուլի խոսնակ, կոնտր-ծովակալ Զեքի Աքթյուրքը ամենշաբաթյա ճեպազրույցում հայտարարել է, որ Թուրքիայի ԶՈւ-ն անխափան և հաջողությամբ շարունակում է գործողությունները՝ երկրի ներսում և սահմանին բոլոր տեսակի սպառնալիքների և վտանգների, հատկապես՝ «PKK/KCK/PYD-YPG, ԴԱԻՇ և FETO ահաբեկչական կազմակերպությունների դեմ», գրում է Անադոլուն։
Նա հայտարարել է, որ Հալեպի շրջանում ընդդիմադիր խմբավորումների նախաձեռնած գործողություններին և դրա հետ կապված զարգացումներին ուշադրությամբ հետևում են։
«Մեր զորքերի կողմից ձեռնարկվում են բոլոր անհրաժեշտ միջոցները տարածաշրջանում կայունությունը պահպանելու համար, և տարածաշրջանի մեր գործընկերների հետ սերտ համագործակցությունն ու համակարգումը շարունակվում է գործընթացի սկզբից ի վեր։ Վերջին զարգացումները և ստեղծված իրավիճակը խնդիրներ են, որոնք երկար ժամանակ չեն լուծվել ընդդիմության պահանջների և ռեժիմի կողմից դրանք հաշվի չառնելու պատճառով, և որոնք բխում են Սիրիայի ներքին դինամիկայից»,- ասել է Աքթյուրքը։
Նա նշել է, որ Անկարան հետևում է Սիրիայի հյուսիսում ձեռք բերված պայմանավորվածություններին և ակնկալում է, որ մյուս կողմն էլ կկատարի դա։
«Մենք ևս մեկ անգամ շեշտում ենք, որ աջակցում ենք Սիրիայի տարածքային ամբողջականությանը, թույլ չենք տա, որ PKK/YPG ահաբեկչական կազմակերպությունը, որը լուրջ վտանգ է ներկայացնում Սիրիայի տարածքային ամբողջականության, ինքնիշխանության և մեր տարածաշրջանի անվտանգության համար, շահի տարածաշրջանում անկայունությունից»,- ասել է Թուրքիայի ՊՆ խոսնակը։
Հիշեցնենք, որ նոյեմբերի 27-ին իսլամիստ ապստամբների կոալիցիան Հայաթ Թահրիր ալ-Շամի (HTS) գլխավորությամբ, որը վայելում է Թուրքիայի աջակցությունը, անսպասելի հարձակում է սկսել Սիրիայի հյուսիսում՝ երկրի նախագահ Բաշար Ասադի բանակի դիրքերի վրա։ Զինյալները գրավել են Հալեպը, ինչպես նաև մի շարք բնակավայրեր, ինչպես նաև ռազմավարական նշանակության Համա քաղաքը։
Թարգմանությունը՝ Էմմա Չոբանյանի
