ԱՄՆ Պետդեպը մտահոգություն է հայտնել Ադրբեջանում հայտնի իրավապաշտպանի ձերբակալության կապակցությամբ և ճնշումները դադարեցնելու կոչ արել

ԱՄՆ Պետքարտուղարության մամուլի փոխխոսնակ Վեդանտ Պատելը ճեպազրույցում անդրադարձել է Ադրբեջանում հայտնի իրավապաշտպան Ռուֆաթ Սաֆարովի ձերբակալությանը՝ հայտնելով Վաշինգտոնի մտահոգությունը Բաքվի իշխանությունների կողմից շարունակական ճնշումների կապակցությամբ։

«Մենք խորապես մտահոգված  ենք Ադրբեջանում մարդու իրավունքների պաշտպան Ռուֆաթ Սաֆարովին ձերբակալելու մասին տեղեկություններով, ուշադիր հետևում ենք այս գործին։ Կարևոր է, որ ամենուր իրավապաշտպանները կարողանան իրենց աշխատանքը կատարել անարգել և ազատ: Մենք շարունակում ենք կոչ անել Ադրբեջանին՝ ազատ արձակել բոլոր անարդարացիորեն ձերբակալվածներին և դադարեցնել քաղաքացիական հասարակության, այդ թվում՝ իրավապաշտպանների և լրագրողների դեմ ճնշումները»,- ասել է Պատելը։

Հարցին՝ արդյո՞ք քաղբանտարկյալների ազատ արձակումը չապահովելը մինչև COP29-ը, այդ ընթացքում և հետո, համարձակություն է տվել Բաքվի ռեժիմին, Պատելը նշել է, որ չի պատրաստվում շահարկումներ անել։

«Այն, ինչ ես պարզապես կրկնելու եմ, այն է, որ մենք կոչ ենք անում Ադրբեջանին ազատ արձակել բոլոր անարդարացիորեն ձերբակալվածներին և դադարեցնել քաղաքացիական հասարակության, այդ թվում՝ իրավապաշտպանների և լրագրողների նկատմամբ բռնությունները»,- ասել է Պետդեպի ներկայացուցիչը։

Նշենք, որ երեկ երեկոյան Բաքվում քաղաքացիական հագուստով անձանց կողմից ձերբակալվել է հայտնի իրավապաշտպան Ռուֆաթ Սաֆարովը։ Նա Defense Line իրավապաշտպան խմբի ղեկավարն է, որը փաստագրում և հաղորդում է Ադրբեջանում քաղաքական դրդապատճառներով ձերբակալությունների, խոշտանգումների և կառավարության կոռուպցիայի մասին։ Սաֆարովն իր իրավապաշտպան գործունեության համար արժանացել է միջազգային մրցանակի, իսկ դեկտեմբերի 6-ին պետք է մեկներ ԱՄՆ՝ մրցանակը ստանալու համար։

Սաֆարովը ձերբակալվել է որպես կասկածյալ Ադրբեջանի քրեական օրենսգրքի 178.3.2 (խարդախություն՝ խոշոր վնաս պատճառելով) և 221.1 (խուլիգանություն) հոդվածներով, լրատվամիջոցներին հայտնել է նրա փաստաբան Բահրուզ Բայրամովը։ Նա նշել է, որ Սաֆարովն իրեն մեղավոր չի ճանաչում և կարծում է, որ իր դեմ քրեական գործ է հարուցվել իրավապաշտպան գործունեության և ԱՄՆ Պետքարտուղարության կողմից մարդու իրավունքների պաշտպանության ոլորտում ջանքերի համար ստացած մրցանակի համար։

Այս հոդվածներով Սաֆարովին սպառնում է մինչև 10 տարվա ազատազրկում։

Էմմա Չոբանյան