26.11.2024 | 23:20
Ադրբեջանում պահեստազորի սպաները բողոքի ակցիա են անցկացրել՝ պահանջելով իրենց հասանելիք վճարումները
Թուրքիայում 70 կգ ոսկով բերման ենթարկված Ադրբեջանի դեսպանության ռազմական կցորդը Բաքվում կալանավորվել է
Քաղաքականություն
26.11.2024 | 19:48
Ստամբուլում 70 կիլոգրամ ոսկով ձերբակալված Ադրբեջանի ռազմական կցորդ Ղահրաման Մամեդովը կալանավորվել է Բաքվի զինվորական դատարանի որոշմամբ։ Ադրբեջանական լրատվամիջոցների հաղորդմամբ՝ Մամեդովը մեղադրվում է Ադրբեջանի Պետական անվտանգության ծառայության (ՊԱԾ) կողմից քննվող քրեական գործով, Քրեական օրենսգրքի 12.1, 206.3.2, 206.3.3 (մաքսանենգություն երկրից դուրս) և 341.1 (պաշտոնեական լիազորությունների չարաշահում կամ լիազորությունների գերազանցում) հոդվածներով։
Բաքվի զինվորական դատարանի որոշմամբ՝ Մամեդովի նկատմամբ խափանման միջոց է ընտրվել կալանավորումը՝ 4 ամիս ժամկետով։
Նշենք, որ օրերս թուրքական լրատվամիջոցները տեղեկություններ էին տարածել, որ Ստամբուլում Vadistanbul առևտրի կենտրոնի մոտ կայանված տաքսու զննությամբ ադրբեջանցու մոտ 70 կգ ոսկի է հայտնաբերվել։ Տղամարդը, որը ներկայացել էր որպես ադրբեջանցի դիվանագետ, խոստովանել էր, որ ոսկին իրեն է պատկանում։ Մաքսանենգության դեմ պայքարի վարչությունը ձերբակալել էր Ադրբեջանի քաղաքացի Ղահրաման Մամեդովին և առգրավել 70 կգ ոսկին։
Ադրբեջանական աղբյուրների տեղեկությունների հանաձայն՝ Մամեդովը նախկինում տարբեր պաշտոններ է զբաղեցրել ՊՆ-ի ենթակա կառույցներում, իսկ վերջին աշխատավայրը եղել է Սաուդյան Արաբիայում Ադրբեջանի դեսպանատունը, որտեղ նա ծառայել է որպես ռազմական կցորդ։ 2017-2021 թթ․ Մամեդովը եղել է ԱՄՆ-ում Ադրբեջանի դեսպանատան ռազմական կցորդի օգնականը։
Այս դեպքի վերաբերյալ Ադրբեջանի ԱԳՆ-ն ու ՊՆ-ն պաշտոնական հայտարարություններ չեն արել։
Միջադեպից հետո Մամեդովին անմիջապես տեղափոխել են Բաքու, որտեղ էլ սկսվել է հետաքննությունը։
Թարգմանությունը՝ Էմմա Չոբանյանի
