09.09.2026 | 08:46
Փաշինյանը մեկնել է Ֆրանսիա՝ մասնակցելու Միջազգային տիեզերական գագաթնաժողովին
Սա լարվածության որակական նոր փուլ է․ Պեսկովը՝ Բայդենի կողմից ATACMS հրթիռներով ՌԴ-ին հարվածելու թույլտվության մասին
Քաղաքականություն
18.11.2024 | 15:09
Ամերիկյան հեռահար ATACMS հրթիռներով Ռուսաստանի տարածքի խորքին հարվածելու՝ ուկրաինական Զինված ուժերին թույլտվությունը նշանակում է լարվածության նոր փուլ և ԱՄՆ-ի ներգրավվածություն Ուկրաինայում պատերազմին։ Այս մասին հայտարարել է ՌԴ նախագահի մամուլի քարտուղար Դմիտրի Պեսկովը, գրում է Meduza-ն։
«Եթե նման որոշումն իսկապես ձևակերպվել և փոխանցվել է Կիևի վարչակարգին, ապա սա լարվածության որակական նոր փուլ է և որակապես նոր իրավիճակ այս հակամարտությունում ԱՄՆ-ի ներգրավվածության առումով»,- ասել է Պեսկովը ճեպազրույցում։
Նա, միաժամանակ, նշել է, որ Կրեմլն առայժմ տիրապետում է միայն արևմտյան ԶԼՄ-ների տեղեկություններին։
«Սակայն ակնհայտ է, որ Վաշինգտոնում հեռացող վարչակազմը մտադիր է քայլեր ձեռնարկել, որպեսզի շարունակեն «կրակի վրա յուղ լցնել» և հրահրել այս հակամարտության շուրջ լարվածության հետագա սրացումը»,- ասել է Կրեմլի ներկայացուցիչը։
Նախօրեին մի շարք ամերիկյան ու եվրոպական լրատվամիջոցներ հայտնել էին, որ ԱՄՆ նախագահ Ջո Բայդենը թույլատրել է ուկրաինացի զինվորականների կողմից ATACMS հրթիռների կիրառումը Ռուսաստանի տարածքին հարվածելու համար։
Ըստ The New York Times-ի՝ ենթադրվում է, որ Ուկրաինայի զինված ուժերը կկարողանան օգտագործել այդ հրթիռները միայն Կուրսկի շրջանում գտնվող ՌԴ-ի և Հյուսիսային Կորեայի զորքերի դեմ։
Թարգմանությունը՝ Էմմա Չոբանյանի
