01.11.2024 | 23:19
Հրդեհ Գյումրու տներից մեկում
Շատերը վախենում են Ադրբեջան գնալ․ COP29-ին մասնակցող ԵԽ պատվիրակությանը հատուկ հեռախոսներ կտրվի՝ անվտանգության նկատառումներից ելնելով
Քաղաքականություն
01.11.2024 | 19:34
Եվրոպացի խորհրդարանականներին հանձնարարվել է զգույշ լինել COP29-ի ժամանակ, որն անցկացվելու է Ադրբեջանում։ Եվրախորհրդարանի անդամներից մեկը՝ Մայքլ Բլոսը, Euronews-ին ասել է, որ մինչ Բաքու մեկնելն իրենց կտրամադրվեն մեկանգամյա օգտագործման հեռախոսներ և նոութբուքեր։
Ըստ ադրբեջանական լրատվամիջոցների՝ Բլոսը կարծում է, որ իրենց հրահանգել են Բաքվում օգտագործել սովորական հեռախոսներ, քանի որ նրանք կարող են սմարթֆոններից գողանալ իրենց անձնական տեղեկությունները։
«Անվտանգության հարցերով խորհրդականները զգուշացրել են մեր սարքերը կոտրելու հնարավորության մասին: Սա նախազգուշական միջոց է՝ հիմնված տարածաշրջանում բռնաճնշումների անձնական փորձի վրա։ Նույնիսկ որպես Եվրախորհրդարանի անդամներ՝ մենք չենք կարող ազատ շփվել՝ առանց կառավարության վերահսկողությունից վախենալու։ Ինձ համար ամեն ինչ պարզ է․ Ադրբեջանը ճնշում է քննադատական ձայները և օգտագործում COP-ը՝ որպես իմիջի կառավարման հարթակ, այլ ոչ թե իրական երկխոսության»,- ասել է պատգամավորը։
Ավելի վաղ էլ Եվրախորհրդի խորհրդարանական վեհաժողովի (ԵԽԽՎ) գերմանական պատվիրակության ղեկավար Ֆրանկ Շվաբեն ասել էր, որ խորհրդարանի անդամներն ու հասարակական կազմակերպությունների ներկայացուցիչները վախենում են գագաթնաժողովի շրջանակում գնալ Ադրբեջան։
«Խորհրդարանի անդամները, հասարակական կազմակերպությունների ներկայացուցիչներն ինձ հարցնում են՝ ի՞նչ կարող է պատահել մեզ հետ, եթե գնանք այնտեղ։ COP-ի վերջին միջոցառումներն անցկացվել են Եգիպտոսում, Արաբական Միացյալ Էմիրություններում։ Մինչ այժմ մասնակցել եմ 20 COP միջոցառումների: Ոչ ոք երբեք չի վախեցել գնալ COP միջոցառումներին: Երբեք չի եղել, որ սովորական մարդիկ անհանգստանան հյուրընկալող երկիր գնալու համար։ Սա առաջին անգամ է տեղի ունենում»,- հայտարարել է ԵԽԽՎ պատգամավորը։
ՄԱԿ-ի կլիմայական COP29 համաժողովն Ադրբեջանում կանցկացվի նոյեմբերի 11-ից 22-ը։
Թարգմանությունը՝ Էմմա Չոբանյանի
