10.10.2026 | 15:55
Հոկտեմբերի 13-ից Հայաստանում սպասվում է անձրև և ամպրոպ
Նոր Գեղիում համայնքապետին կփոխեն ստորագրահավաքի միջոցով․ առաջարկ՝ մարզպետից
Քաղաքականություն
14.09.2018 | 14:00
Կոտայքի մարզի Նոր Գեղի համայնքի բնակիչներն այսօր վաղ առավոտից բողոքի ակցիա են իրականացնում՝ ընդդեմ համայնքի ղեկավար Ֆրոնտիկ Թևոսյանի պաշտոնավարման։
Ակցիայի մասնակիցները Factor.am-ի հետ զրույցում նշեցին, որ նորանշանակ համայնքի ղեկավարը անտեղյակ է համայնքում առկա խնդիրներից։ ««Քաղաքացիական պայմանագիր» կուսակցության անդամ է համայնքապետը, նա կապ չունի ո՛չ մեր համայնքի, ո՛չ էլ մեր բարձրացրած խնդիրների հետ։ Համայնքի անդամներն այսօր վաղ առավոտից հավաքվել են համայնքապետարանի շենքի դիմաց և պահանջում են ղեկավար նշանակել մի մարդու, ով մեր համայնքից է և ընդունակ կլինի առկա խնդիրները լուծել»,- ասացին ակցիայի կազմակերպիչները։
Տեղեկացանք, որ Նոր Գեղի է ժամանել Կոտայքի մարզպետ Ռոմանոս Պետրոսյանը, ով մոտ երկու ժամ բնակիչների հետ քննարկել է իրավիճակը եւ առաջարկել ստորագրահավաք սկսել համայնքում իրենց նախընտրելի թեկնածուի օգտին։
«Մենք տեղեկացրինք, որ մեր նախընտրելի թեկնածուն մեր համայնքի բնակիչ Աշոտ Գրիգորյանն է, ում թեկնածությունը համայնքի ղեկավարի պաշտոնում առաջադրելու համար էլ սկսել ենք ստորագրահավաք»,- նշեցին ակցիայի կազմակերպիչները։
