08.10.2026 | 10:22
Երևան–Սևան ճանապարհին միկրոավտոբուս է կողաշրջվել․ 8 տուժած կա
ԵՄ-ն պատժամիջոցներ կսահմանի Իրանի դեմ՝ ՌԴ-ին բալիստիկ հրթիռներ մատակարարելու համար
Քաղաքականություն
04.10.2024 | 19:23
Եվրամիությունը նախատեսում է նոր պատժամիջոցներ սահմանել Իրանի դեմ՝ Ռուսաստանին բալիստիկ հրթիռներ մատակարարելու համար, հայտնում է Bloomberg-ը՝ հղում անելով իրազեկ աղբյուրներին։
Պատժամիջոցների փաթեթը կվերաբերի ավելի քան տասը ֆիզիկական և իրավաբանական անձանց, այդ թվում՝ ինժեներական, մետալուրգիայի և ավիացիայի ոլորտներում ներգրավված ընկերությունների։ Ակնկալվում է, որ միջոցառումները կհաստատվեն հոկտեմբերի վերջին Բրյուսելում կայանալիք ԵՄ առաջնորդների գագաթնաժողովում։ Միաժամանակ, արդեն քննարկվում են լրացուցիչ սահմանափակումներ, ասել են գործակալության զրուցակիցները։
Աղբյուրներից մեկը նաև նշել է, որ ԱՄՆ-ը նախատեսում է պատժամիջոցներ կիրառել Իրանի դեմ Իսրայելի վրա վերջին հրթիռային հարձակման համար և պահանջում է իր դաշնակիցներից նմանատիպ քայլեր ձեռնարկել։
Սեպտեմբերի սկզբին հայտնի դարձավ, որ Իրանը 200 «Ֆաթեհ-360» փոքր հեռահարության բալիստիկ հրթիռ է փոխանցել Ռուսաստանին։ ԱՄՆ-ը և Մեծ Բրիտանիան կարծում են, որ Մոսկվան կարող է միջուկային տեխնոլոգիաներ փոխանցել Թեհրանին հրթիռների դիմաց:
Այս ֆոնին ԱՄՆ-ը և Եվրոպան լրացուցիչ պատժամիջոցներ են սահմանել Իրանի դեմ՝ ուղղված իրանական ընկերությունների և ֆիզիկական անձանց, որոնք կապված են Ռուսաստանին ռազմական մատակարարումների հետ, ինչպես նաև ազգային ավիափոխադրողի՝ Iran Air-ի դեմ:
Մոսկվայի և Թեհրանի միջև ռազմական համագործակցությունը զգալիորեն աճել է 2022 թվականի փետրվարին Ուկրաինա ռուսական ներխուժումից հետո:
Թարգմանությունը՝ Տաթև Ֆռանգյանի
