Տարհանման ծրագիր այս պահին չի նախատեսվում․ ինչ իրավիճակ է Լիբանանի հայ համայնքում

Լիբանանի այն բնակավայրերը, որտեղ հայ համայնք կա, ռազմական գոտիներից հեռու են և անմիջականորեն վտանգված չեն, այս մասին Factor.am-ի հետ զրույցում տեղեկացրեց Բեյրութում լույս տեսնող «Ազդակ» թերթի գլխավոր խմբագիր Շահան Գանտահարյանը։

Նրա խոսքով՝ Իսրայելի հարձակման հետևանքով տուժածների շրջանում հայեր, բարեբախտաբար, չկան։ Գանտահարյանը, սակայն, մատնանշեց, որ հայ համայնքը, բնականաբար, կրում է այն բոլոր հետևանքները, ինչ Լիբանանի ժողովուրդը՝ քաղաքական անորոշություն, ֆինանասական ճգնաժամ, ռազմական գործողությունների հետևանքով ծագած խնդիրներ։ Ոչ պաշտոնական տվյալներով Լիբանանում շուրջ 120 հազար հայ է ապրում։

«Պայթյունների ձայները երբեմն լսվում են նաևԲեյրութի հարավային արվարձաններում։ Այս պահի դրությամբ նշեմ, սակայն, որ տարհանման գործողություններ չեն նախատեսվում։ Դիվանագիտական ներկայացուցիչները ևս իրենց քաղաքացիների համար նման գործողություններ այս պահին չեն իրականացնում։ Իհարկե, բոլոր երկրները, որպես կանոն, զգուշացնում, հորդորում են իրենց քաղաքացիներին չգնալ Լիբանան»,- փոխանցեց մեր զրուցակիցը։

«Ազդակ» թերթի գլխավոր խմբագիրը նաև ասաց, որ վերջին իրադարձություններից հետո Բեյրութում գործող հայկական քաղաքական կուսակցությունները նիստ են անցկացրել, քննարկել տարբեր սցենարների դեպքում համակարգված աշխատելու, հատկապես փախստականների հարցերը համակարգելու խնդիրները:

«Հանդիպել են նաև հայկական մարդասիրական խմբերը, հայ բարեսիրական միությունների ներկայացուցիչները, քննարկել են փախստականների կենցաղային, դեղորայքային, սննդի խնդիրները լուծելու հարցերը՝ ռազմական գործողությունների հայաբնակ շրջաններ հասնելու դեպքում»,- մանրամասնեց նա։

Շահան Գանտահարյանը հայտնեց, որ օտարերկրյա բազմաթիվ ավիաընկերություններ իրենց թռիչքներն առկախել են կամ չեղարկել, բայց լիբանանյան ավիաընկերությունները շարունակում են չվերթները, այդ թվում՝ իրականացվում է նաև Բեյրութ- Երևան չվերթը։

Հիշեցնենք՝ Իսրայելի պաշտպանության բանակը երեկ երեկոյան հայտարարել է, որ սահմանափակ ցամաքային գործողություններ է սկսել Լիբանանի հարավի սահմանային շրջաններում։ Ըստ բանակի մամուլի ծառայության հաղորդագրության՝ թիրախները շիական «Հըզբոլլահ» կազմակերպության զինված կազմավորումների օբյեկտներն են։

Մանյա Պողոսյան