23.06.2026 | 06:00
ԱԱ-2026. Նորվեգիան դուրս եկավ փլեյ-օֆֆ, Հոլանդը դարձյալ դուբլն գրանցեց. ՏԵՍԱՆՅՈՒԹ
Ստոլտենբերգը ՆԱՏՕ-ի գլխավոր քարտուղարի լիազորությունները փոխանցել է Մարկ Ռյուտեին
Քաղաքականություն
01.10.2024 | 12:41
Յենս Ստոլտենբերգը ՆԱՏՕ-ի գլխավոր քարտուղարի լիազորությունները փոխանցել է Նիդերլանդների նախկին վարչապետ Մարկ Ռյուտեին։ Արարողությունը տեղի է ունեցել Բրյուսելում՝ Հյուսիսատլանտյան դաշինքի կենտրոնակայանում, գրում է Current time-ը։
Լիազորությունների փոխանցման պահը նշելու համար Ստոլտենբերգը Ռյուտեին է փոխանցել 1963 թվականին Իսլանդիայի կողմից ՆԱՏՕ-ին նվիրած մուրճն ու հրավիրել նրան զբաղեցնելու Հյուսիսատլանտյան խորհրդի ղեկավարի աթոռը։
Նորվեգիայի նախկին վարչապետ Յենս Ստոլտենբերգը ՆԱՏՕ-ի գլխավոր քարտուղարի պաշտոնը զբաղեցնում էր վերջին տասը տարիներին։ Նրան փոխարինած Մարկ Ռյուտեն 2010 թվականի հոկտեմբերից Նիդերլանդների վարչապետն ու ընդհանուր գործերի նախարարն է եղել։
Ստոլտենբերգը Ռյուտեին ներկայացրել է որպես լավ ընկերոջ ու գործընկերոջ, որի հետ միասին երկար տարիներ աշխատել են։
«Նա լավ գիտի ՆԱՏՕ-ն, և դա լավ գիտեն ամբողջ դաշինքում։ Մարկը 14 տարի աշխատել է որպես վարչապետ՝ ղեկավարելով չորս տարբեր կոալիցիոն կառավարություններ: Ուստի նա գիտի, թե ինչպես հասնել փոխզիջումների և կոնսենսուս ստեղծել։ Սրանք հմտություններ են, որոնք բարձր են գնահատվում այստեղ՝ ՆԱՏՕ-ում: Ուստի ՆԱՏՕ-ն լավ ձեռքերում կլինի»,- ասել է Ստոլտենբերգը։
Նա հավելել է, որ իրեն հիմա ավելի հեշտ է լքել դաշինքը՝ իմանալով, որ այն ղեկավարելու է Ռյուտեն։
«Եկել է հեռանալու ժամանակը։ Ինձ փոխարինող հիանալի իրավահաջորդ կա։ Սակայն ինձ համար դժվար է լքել դաշինքը և այն կազմակերպությունը, որին ծառայել եմ 10 տարի։ Բոլոր այն մարդկանց, բոլոր պետություններին, որոնց հետ ես աշխատել եմ, իհարկե, կկարոտեմ»,- ասել է նա։
Թարգմանությունը՝ Էմմա Չոբանյանի
