30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Ուկրաինայի ՊՆ ղեկավարն աշխատանքից ազատել է իր չորս տեղակալներին
Քաղաքականություն
01.10.2024 | 12:02
Ուկրաինայի պաշտպանության նախարար Ռուստեմ Ումերովը հայտարարել է իր ութ տեղակալներից չորսին աշխատանքից ազատելու մասին։ Նա ֆեյսբուքյան իր էջում նշել է, որ Ստանիսլավ Գայդերի, Ալեքսանդր Սերգեյի, Յուրի Ջիգիրի և Լյուդմիլա Դարագանի հրաժարականի մասին որոշումն այսօր կներկայացվի Նախարարների կաբինետին, գրում է DW-ի ռուսական ծառայությունը։
Ումերովի տեղեկացմամբ՝ Գայդերը կտեղափոխվի պաշտպանության նախարարի գրասենյակի ղեկավարի պաշտոնին։
Ուկրաինայի պաշտպանության նախարարը կադրային փոփոխությունների որոշումը բացատրել է իր ղեկավարած գերատեսչության համակարգին ներկայացվող պատերազմի ժամանակի պահանջներով։
«Բոլոր գործընթացները պետք է լինեն հստակ և վերահսկվող։ Դրանց վրա ազդելու ցանկացած արտաքին կամ ներքին փորձ անընդունելի է»,- գրել է նա։
Միաժամանակ, Ումերովը հայտնել է պաշտպանական գնումների համակարգի բարեփոխման և «Սպեցտեխնոէքսպորտ» պետական ձեռնարկությունը Գլխավոր հետախուզական վարչությունից Պաշտպանության նախարարությանը փոխանցելու մասին:
Նա նաև նշել է Պաշտպանական գնումների գործակալության և Թիկունքի ապահովման պետական օպերատորի բարեփոխումների գործընթացի շարունակման մասին՝ ՆԱՏՕ-ի չափանիշներին մոտենալու շրջանակում։
«Առաջիկայում երկու կառույցների համար էլ կստեղծվեն դիտորդական խորհուրդներ»,- հավելել է պաշտոնյան։
Թարգմանությունը՝ Էմմա Չոբանյանի
