ԱՄՆ-ը և դաշնակիցները կոչ են արել հրադադար հաստատել Իսրայելի և «Հըզբոլլահ»-ի միջև

ԱՄՆ-ը, Ֆրանսիան և այլ դաշնակիցներ կոչ են արել անհապաղ 21-օրյա հրադադար հաստատել Իսրայելի և Լիբանանի սահմանին։ ԱՄՆ պաշտոնյան Reuters-ին ասել է, որ զինադադարը կարող է օգտագործվել տարածաշրջանում մշտական ​​խաղաղություն հաստատելու համար:

The New York Times-ը, վկայակոչելով անանուն ամերիկացի պաշտոնյաներին, գրում է, որ Իսրայելն ու Լիբանանն աջակցել են բանակցությունների առաջարկին և կարող են համաձայնել ԱՄՆ-ի նախաձեռնությանը 48 ժամվա ընթացքում։

«Մենք կոչ ենք անում անհապաղ 21-օրյա հրադադար հաստատել լիբանանա-իսրայելական սահմանին, որպեսզի տարածք տա դիվանագիտության համար: Մենք կոչ ենք անում բոլոր կողմերին, այդ թվում՝ Իսրայելի և Լիբանանի կառավարություններին, անհապաղ հաստատել կրակի ժամանակավոր դադարեցումը»,- ասված է հայտարարության մեջ, որը մեջբերում է Associated Press-ը։

Politico-ի փոխանցմամբ էլ՝ ԱՄՆ նախագահի աշխատակազմն աշխատում էր Ֆրանսիայի և արաբական երկրների հետ համաձայնագրի վրա։ Փաստաթուղթը քննարկվել է ՄԱԿ-ի Գլխավոր վեհաժողովի ժամանակ։ Սպիտակ տունը հայտնել է, որ գործարքին աջակցել են Գերմանիան, Ավստրալիան, Կանադան, Սաուդյան Արաբիան և Կատարը:

Հրադադարը կտարածվի մինչև կապույտ գիծը՝ իսրայելա-լիբանանյան սահմանը, որը որոշվել է ՄԱԿ-ի կողմից 2000 թվականին։ Reuters-ի աղբյուրի համաձայն՝ ԱՄՆ-ը ձգտում է երեքշաբաթյա զինադադարը վերածել ավելի լայն համաձայնագրի, որը, ի թիվս այլ բաների, կկարգավորի Գազայի հատվածում հակամարտությունը:

Սեպտեմբերի 23-ին Իսրայելի իշխանությունները հայտարարեցին Լիբանանում ռազմական գործողություն սկսելու մասին։ Դրա նպատակը «Հըզբոլլահ» շարժման ոչնչացումն է և հյուսիսային Իսրայելի 60 հազար տարհանված բնակիչների վերադարձն իրենց տները։

Թարգմանությունը՝ Տաթև Ֆռանգյանի