Արևմուտքը վիճարկում է ՌԴ-ի դերը՝ ռեգիոնից դուրս մղելու խնդիր է դրված․ Ալիևի դիրքերը կսասանվեն, եթե դա կատարվի․ Լիլիթ Դալլաքյան․ ՏԵՍԱՆՅՈՒԹ

ՀՀ վարչապետը ՄԱԿ-ի ամբիոնից երեկ խոսում էր պոզիտիվ խոսույթ ձևավորելու և ոչ թե հարևան երկրներին մեղադրելու կարևորության մասին․ «Ջանք պետք է գործադրել լավ ապագայի նախադրյալները տեսնելու և դրանց շուրջ մտածելու համար»,- ասում էր նա։ Այնինչ գրեթե նույն պահին՝ Ադրբեջանի նախագահը Միլի մեջլիսում ասում էր, թե ՀՀ-ում ռևանշիստական ուժերը գլուխ են բարձրացնում․ «Սրանք միայն մարգինալ քաղաքական տարրեր չեն, ՀՀ-ի գործող իշխանությունները նույն մտքերով ու երազանքներով են ապրում։ Թեև բառերով այլ բաներ են ասում, բայց իրենց գործերը, քաղաքականությունը, լրիվ հակառակ պատկեր են ստեղծում։ Նրանք չեն ցանկանում հաշտվել Ղարաբաղյան երկրորդ պատերազմի և հակաահաբեկչական գործողության արդյունքների հետ։ Դա է վկայում Մինսկի խմբի ֆորմալ պահպանումն առ այսօր, որը գործառնական նշանակություն չունի»։ Ալիևն ընդգծել էր, որ իրենց թիվ մեկ խնդիրը ռազմական հզորացումն է։ Փաշինյանն իրո՞ք ռևանշիստ է՝ հարցը Factor TV-ի տաղավարում ուղղեցինք քաղաքագետ Լիլիթ Դալլաքյանին։

«Փաշինյանը վախվորած՝ Ալիևին ուզում է ապացուցել, որ խաղաղասեր է, ուզում է թուղթ ստորագել, կապ չունի՝ մեկ թե 100 կետն է համաձայնեցված։ Նա պարտավոր է հաղթահարել հոգեբանական դժվարությունները։ Նպատակ կա ինչ-որ թուղթ ստորագրել։ Կարծում եմ՝ Նիկոլ Փաշինյանը ռեալ չի գնահատում իրավիճակը, չի գիտակցում, թե ինչ է կատարվում աշխարհում, տարածաշրջանում և ինչ-որ վերացական խաղաղության խաչմերուկներում է ապրում, և սա արդեն վտանգավոր է դառնում մեր պետականության համար։ Մենք պարտավոր ենք մեր պետության ու անվտանգության մասին մտածել։ Տեսեք, թե ինչ ելույթներ են ունենում ՄԱԿ-ի ամբիոնից՝ Բայդենը, Իրանի նախագահը, Զելենսկին։ Բոլորը խոսում են լուրջ հարցերից, մինչդեռ Նիկոլ Փաշինյանը կարծես ռեալ չի մտածում։ Ես չգիտեմ՝ ռազմավարությո՞ւնն է բացակայում։ Ցավոք, չեն արդարանում իմ այն հույսերը, որ իշխանությունը ՀՀ-ն կտանի ճիշտ ճանապարհով։ Ալիևն ուզում է՝ Փաշինյանը հանձնվի, Ղարաբաղից չի խոսում, բայց «Զանգեզուրի միջանցք»-ի պահանջը չի կատարում։ Ալիևը առավելապաշտական դիրքերից է խոսում, հարձակվողական է՝ ագրեսիվ։ Փաշինյանի այս խղճուկ պաշտպանվողականությունը սխալ է, ուզում է՝ հանձնվես մինչև վերջ, ինքն է ագրեսորը՝ միջազգային օրենքները խախտել է»,- ասաց քաղաքագետը։

Հարցազրույցն ամբողջությամբ՝ տեսանյութում։

Ռոբերտ Անանյան