07.12.2025 | 21:40
Վարդենյաց լեռնանցքում ձյուն է տեղում. Դիլիջանի, Սպիտակի ոլորաններում մառախուղ է
Թեհրանը չի ձգտում միջուկային զենք ստեղծել և պատրաստ է բանակցել․ Իրանի նախագահը՝ Շառլ Միշելին
Քաղաքականություն
24.09.2024 | 16:24
Իրանի նախագահ Մասուդ Փեզեշքիանը Նյու Յորքում բանակցություններ է անցկացրել Եվրոպական խորհրդի նախագահ Շառլ Միշելի հետ։ Իրանական Mehr գործակալության փոխանցմամբ՝ հանդիպմանը Փեզեշքիանը հայտարարել է, որ Իրանը ձգտում է ընդլայնել փոխըմբռնումն ու համագործակցությունը՝ ինչպես երկրի ներսում, այնպես էլ տարածաշրջանային ու միջազգային ասպարեզներում: Նա «սիոնիստական ռեժիմի հանցագործությունների շարունակությունն ու էսկալացիան» անվանել է «տարածաշրջանի և աշխարհի ամենալուրջ խնդիրն այսօր»։
«Մինչ Իրանի ժողովուրդն ինձ ընտրեց միասնության, կարեկցանքի և աշխարհի հետ փոխգործակցության կարգախոսով, և ես դարձա նախագահ, սիոնիստական ռեժիմը փորձեց Իրանի Իսլամական Հանրապետությանը ներքաշել պատերազմի մեջ՝ սպանելով մեր սիրելի հյուր Հանիեին հենց իմ երդմնակալության օրը»,- հայտարարել է Փեզեշքիանը։
«Ինչ վերաբերում է միջուկային խնդրին, Իրանի Իսլամական Հանրապետությունը դրսևորել է խնդիրը լուծելու իր կամքը, և այսօր մենք պատրաստ ենք բանակցել և փորձել լուծել խնդիրը»,- հավելել է նա։
Շառլ Միշելն էլ իր հերթին հայտարարել է․ «Մենք ցանկանում ենք, որ Իրանը կառուցողական դերակատարում ունենա Պաղեստինի, Ուկրաինայի հակամարտության և միջուկային խնդրի շուրջ համաձայնության հասնելու հարցերում»:
Թարգմանությունը՝ Էմմա Չոբանյանի
