23.06.2026 | 12:43
Փաշինյանի որոշմամբ կարկտահարության դեպքերն ուսումնասիրող աշխատանքային խումբ է ստեղծվել
Լիբանանի իշխանությունները հայտնել են Իսրայելի հարվածների հետևանքով 100 զոհի և 400 վիրավորի մասին
Քաղաքականություն
23.09.2024 | 17:16
Իսրայելի ռազմաօդային ուժերի հարվածները Լիբանանի հարավում 100 մարդու կյանք են խլել, ավելի քան 400 մարդ վիրավորվել է։ Այս մասին հայտնում է Al Mayadeen հեռուստաալիքը՝ հղում անելով Լիբանանի առողջապահության նախարարությանը։
Սա բախումների գրեթե մեկ տարվա ընթացքում մեկ օրվա կտրվածքով մահացությունների ամենաբարձր թիվն է, նշում է AFP-ն։
Իսրայելի պաշտպանության բանակը (IDF) հայտնել է, որ վերջին 24 ժամվա ընթացքում հարվածներ է հասցրել լիբանանյան «Հըզբոլլահ» շարժման ավելի քան 300 թիրախների։ Ըստ The Times of India-ի՝ Իսրայելի պաշտպանության բանակը պնդում է, որ «Հըզբոլլահ»-ը թևավոր հրթիռներ է տեղադրում բնակելի շենքերի ներսում։
Իսրայելի զինվորականները խորհուրդ են տալիս «Հըզբոլլահ»-ի կողմից ռազմական նպատակներով օգտագործվող տներում և տարածքներում ապրող խաղաղ բնակիչներին «անհապաղ հեռանալ ռիսկային տարածքից՝ իրենց իսկ անվտանգության համար»:
Սեպտեմբերի 17-ին և 18-ին Լիբանանում տարբեր կապի սարքերի բազմաթիվ պայթյուններ են տեղի ունեցել՝ փեյջերներ, նոութբուքեր, ռացիաներ։ Արդյունքում զոհվել է ավելի քան 30 մարդ, շուրջ 4 հազարը՝ վիրավորվել։ «Հըզբոլահը» մեղադրել է Իսրայելին, այս վարկածը հաստատում են նաև արևմտյան լրատվամիջոցները։
Իսրայելը հերքել է իր մասնակցությունը հարձակմանը:
