Վիվալդիի «Տարվա եղանակները»՝ ժամանակակից նոր լուծումներով․ հայ հանդիսատեսին ներկայացվեց դասական ու ժամանակակից երաժշտության միախառնումը

Սեպտեմբերի 11-ին հայ հանդիսատեսը հնարավորություն ունեցավ ունկնդրելու դասական ու ժամանակակից երաժշտության միախառնումը․ Վիվալդիի «Տարվա եղանակները» օրիգինալ՝ լարային կազմով, ներկայացվեց նոր լուծումներով։

«Նյու Ջեներեյշն» նվագախմբի գեղարվեստական ղեկավար Նարեկ Գասպարյանի խոսքով՝ նախագծի նպատակը դասական ու սիրված ստեղծագործության միախառնումն է գերժամանակակից երաժշտական տեխնոլոգիաների հետ:

Ստեղծագործական թիմն օգտագործել է Վիվալդիի «Տարվա եղանակների» օրիգինալ պարտիտուրան։

«Նյու Ջեներեյշն Փրոջեքթ»-ի գործադիր տնօրեն Շմավոն Գրիգորյանն ասում է՝ այս մտահղացումը իրենց թիմի մոտ առաջացել էր դեռ նախորդ տարի։

«Մենք միշտ փորձում ենք կյանքի կոչել տարբերվող և ինքնատիպ նախագծեր։ Ու այս նախագիծը ևս տեսակով բացառիկ է, քանի որ թե՛ Հայաստանում, թե՛ ամբողջ աշխարհում սա լինելու է առաջին անգամ: Մեզ հաջողվել է համախմբել տաղանդավոր ստեղծագործողների և արդյունքը միանշանակ գոհացնելու է մեր հանդիսատեսին։ Եվ սա ևս մեկ առիթ է երիտասարդներին ավելի մոտեցնելու դասական արվեստին։ Ու նաև կուզենամ նշել, որ արդեն իսկ տարվում են բանակցություններ Vivaldi DJ նախագիծը մի շարք երկրներում ներկայացնելու շուրջ»,- ասել է Գրիգորյանը։

Beatbox հայկական ասոցիացիայի ղեկավար Բագրատ Տերտերյանն (DJ BeatMan) ասում է՝ Vivaldi DJ նախագիծը աննախադեպ է, այն երաժշտական աշխարհի տարբեր բևեռների համադրություն է։

«Համերգից հետո ստացել եմ շատ զանգեր և նամակներ, բոլորի մոտ շատ դրական տպավորություններ են, դրական արձագանքներ ունենք։ Ես ինքս շատ խորացած էի պրոցեսի մեջ, դրա համար որպես հանդիսատես չեմ կարող դատել, բայց ամեն դեպքում մտերիմները, ընկերները հիացմունքից բացի այլ բան չեն արտահայտել։ Արվեստի գործիչներ, բիզնես ոլորտի ներկայացուցիչներ․․․ շատ տարբեր մարդիկ կային, շատ ողջունեցին մեր համատեղ արձագանքը, սպասում են՝ երբ է լինելու երկրորդը»,- համերգից հետո Factor.am-ի հետ զրույցում պատմեց Բագրատ Տերտերյանը։

Առաջիկայում ինչպես Հայաստանում, այնպես էլ արտերկրում նախատեսվում է ներկայացնել VIVALDI DJ, Aram Khachaturian DJ, Arno Babajayan DJ, Mozart DJ նախագծերը:

Անժելա Պողոսյան