Ղրիմն Ուկրաինային վերադարձնելը միջազգային իրավունքի պահանջն է․ Էրդողան

Անկարայի աջակցությունն Ուկրաինայի տարածքային ամբողջականությանը, ինքնիշխանությանը և անկախությանը մնում է անփոփոխ։ Այս մասին հայտարարել է Թուրքիայի նախագահ Ռեջեփ Թայիփ Էրդողանը Ղրիմի պլատֆորմի 4-րդ գագաթնաժողովի մասնակիցներին ուղղված տեսաուղերձում, գրում են թուրքական լրատվամիջոցները։

Նա ընդգծել է, որ Ղրիմի վերադարձն Ուկրաինային միջազգային իրավունքի պահանջն է։

«Թուրքիան անկեղծորեն ցանկանում է, որ պատերազմն ավարտվի արդար և կայուն խաղաղությամբ՝ հիմնված Ուկրաինայի տարածքային ամբողջականության, ինքնիշխանության և անկախության վրա»,- ասել է Էրդողանը՝ շնորհակալություն հայտնելով բոլոր նրանց, ովքեր ներդրում են ունեցել գագաթնաժողովի կազմակերպման գործում, առաջին հերթին՝ իր ուկրաինացի գործընկեր Վլադիմիր Զելենսկիին և Ղրիմի թաթարների առաջնորդ Մուսթաֆա Քիրիմօղլուին։

Նա հիշեցրել է, որ այս տարվա գագաթնաժողովը համընկնում է Ղրիմի թաթարների տեղահանության 80-ամյակի հետ ու նշել, որ «իրենց հայրենիքից բռնի կերպով վտարված Ղրիմի թաթար թուրքերի ապրած ողբերգության ցավը չի հանդարտվել, և դրանից առաջացած վերքերը չեն սպիացել 80 տարիների ընթացքում»։

Էրդողանը հայտարարել է՝ Թուրքիան երբեք չի ճանաչել Ղրիմի բռնակցումը, որը «սրացրել է տարածաշրջանի բնակչության տառապանքը»։ Նա ընդգծել է, թե «Ղրիմի բնիկ ժողովուրդներից մեկի՝ թաթար թուրքերի անվտանգության և բարեկեցության ապահովումը Թուրքիայի արտաքին քաղաքականության առաջնահերթություններից է»։

Թուրքիայի ղեկավարը հույս է հայտնել, որ առաջիկայում «լրացուցիչ քայլեր կձեռնարկվեն Ղրիմի թաթար թուրքերի իրավունքների ամրապնդման համար»։ Նա նաև գոհունակություն է հայտնել երեք տարվա ազատազրկումից հետո Ղրիմի թաթարների Մեջլիսի փոխնախագահ Նարիման Ջելալի ազատ արձակման կապակցությամբ։