15.09.2026 | 10:45
Սևանի նախկին քաղաքապետ Ռուդիկ Ղուկասյանը մեղադրվում է համայնքին շուրջ 13.7 մլն դրամի վնաս պատճառած գործարքի համար
«Գլխառադ արածից էլ բեթար ա»․ ինչո՞ւ է Ակների նորակառույց ճանապարհը 6-ի փոխարեն 4 մ լայնությամբ. ՏԵՍԱՆՅՈՒԹ
Հասարակություն
10.09.2024 | 19:55
Լոռու մարզի Ակներ բնակավայրի մի խումբ բնակիչներ երեկ փակել էին գյուղ մտնող ճանապարհը։ Բողոքում են, որ նորակառույց ճանապարհը նեղ է։ Գյուղի նոր կառուցված ճանապարհը նախկինից 2 մետր նեղ է և դարձել է վտանգավոր երկկողմանի երթևեկության համար։
Ալավերդի-Սանահին-Ակներ 10 կիլոմետրանոց ճանապարհահատվածը կառուցվում է Կառավարության ֆինանսավորմամբ՝ «Ճանապարհային դեպարտամենտ» հիմնադրամի կողմից։ «Անկյուն+3» մարզային հեռուստատեսությանը բնակիչները պատմել են, որ 400 մետր երկարությամբ հատվածը կառուցվել է 4 մետր լայնությամբ, այն դեպքում, երբ սկզբում նախատեսված է եղել 6 մետր։
Ակներ վարչական շրջանի ղեկավար Արկադի Սիմոնյանը Factor TV-ին հայտնեց, որ բնակիչները դիմել են վարչապետի աշխատակազմ, ՏԿԵ նախարարություն, ԱԺ տարածաշրջանային և եվրասիական ինտեգրման հարցերի մշտական հանձնաժողով և «Ճանապարհային դեպարտամենտ» հիմնադրամ։ Սիմոնյանի խոսքով՝ դեռևս միայն Ազգային ժողովից են արձագանքել բնակիչների բողոքին և տեղում ծանոթացել խնդրին։ Տեղացիներն էլ պնդում են՝ կար հնարավորություն ճանապարհը լայնացնելու։
Սկզբնական նախագծով՝ ճանապարհի լայնությունը պետք է լիներ 6 մետր։ Տարածքային կառավարման և ենթակառուցվածքների նախարարի մամուլի քարտուղար Սոնա Հարությունյանը Factor TV-ին փոխանցեց, որ Ալավերդի համայնքի ղեկավարի որոշմամբ է նախագծում փոփոխություն կատարվել և ճանապարհը նեղացվել։
Բնակիչները վստահ են՝ հնարավոր է գոնե 1 մետրով լայնացնել ասֆալտե ծածկը կողնակի հաշվին՝ առանց գյուղացիներին պատկանող հողամասերի տարածք մտնելու։
Ալավերդի համայնքի ղեկավար Դավիթ Ղումաշյանն ասում է՝ Ակներ գյուղ հասնող ճանապարհի աջ և ձախ կողմերում իրենց սեփականության իրավունքով պատկանող հողամասերում սեփականատերերը թույլ չեն տվել շինարարություն անել։
Համայնքի ղեկավարի խոսքով՝ Ճանապարհային դեպարտամենտի հետ քննարկումներ են ընթանում լուծումներ գտնելու համար, և մոտ օրերս բնակիչներին կտրամադրվեն պարզաբանումներ հարցը կարգավորելու վերաբերյալ։
Մանրամասները՝ տեսանյութում։
Անի Թամրազյան
