Կարևոր է դեմ արտահայտվել ցանկացած քողարկված օրակարգի, որն ուղղված է միջազգայնորեն ճանաչված սահմանների փոփոխությանը․ Իրանի ԱԳ փոխնախարար. ՏԵՍԱՆՅՈՒԹ

Իրանը ողջունում է և պատրաստ է նպաստել Հայաստանի ու Ադրբեջանի միջև խաղաղության պայմանագրի կնքմանը, սակայն կարևոր է դեմ արտահայտվել ցանկացած քողարկված օրակարգի, որն ուղղված է միջազգայնորեն ճանաչված սահմանների փոփոխությանը։ Այս մասին հայտարարել է Իրանի փոխարտգործնախարար Մոհամմադ Հասան Շեյխոլեսլամին «Երևանյան երկխոսություն» միջազգային ֆորումի շրջանակում պանելային քննարկման ժամանակ։

«Իրանն այսօր շարժիչ ուժ է մեր տարածաշրջանում խաղաղության և կայունության հաստատման համար ու ամբողջությամբ պատրաստ է կառուցողական գործընթացներին։ Այս համատեքստում մենք ողջունում ենք խաղաղ բանակցությունները Հայաստանի և Ադրբեջանի միջև՝ կարևորելով նաև խաղաղության պայմանագրի ստորագրումը երկու հարևանների միջև։ Մենք պատրաստ ենք օգնել Հայաստանին և Ադրբեջանին հարաբերությունների կարգավորման գործում։ Կողմ ենք միասնական տարածաշրջանի հայեցակարգին՝ զարգացնելով բարիդրացիության կացութաձևը։ Անշուշտ, համաձայն ենք նաև տարածաշրջանային հաղորդակցությունների ապաշրջափակմանը, միաժամանակ, ընդգծում ենք երկրների ինքնիշխանությունն ու տարածքային ամբողջականությունը հարգելու, ինչպես նաև նրանց տարածքներով անցնող ճանապարհների ինքնիշխանությունը ճանաչելու սկզբունքը։ Մենք հարգում ենք փոխադարձ հետաքրքրություն ներկայացնող շահերն այս տարածաշրջանում»,- հայտարարել է Իրանի փոխարտգործնախարարը։

Միևնույն ժամանակ, նա ընդգծել է երկրների տարածքային ամբողջականությունը, ինքնիշխանությունն ու իրավասությունը հարգելու անհրաժեշտությունը։

«Մենք կարծում ենք, որ Հարավային Կովկասը չպետք է դառնա մրցակցության դաշտ արտաքին ուժերի պայքարի համար։ Այս համատեքստում մենք կարևորում ենք դեմ արտահայտվել ցանկացած քողարկված օրակարգի, որն ուղղված է տարածաշրջանի ապակայունացմանն ու միջազգայնորեն ճանաչված սահմանների փոփոխության համար հիմքեր ստեղծելուն»,- հայտարարել է իրանցի դիվանագետը:

Մանրամասները՝ տեսանյութում։