16.12.2025 | 21:58
Ադրբեջանն ու Թուրքիան միմյանց ռազմական օգնություն կցուցաբերեն ագրեսիայի դեպքում
Ռուբեն Վարդանյանի՝ Հարկային օրենսգրքի վերաբերյալ իմացությունը, երևի, այնքան էլ խորը չէ. ՊԵԿ նախագահ
Տնտեսություն
10.09.2018 | 13:13
Ռուբեն Վարդանյանի՝ հարկային օրենսգրքի վերաբերյալ իմացությունն այնքան էլ խորը չէ: Այս մասին այսօր հրավիրված մամուլի ասուլիսում հայտարարեց ՀՀ պետեկամուտների կոմիտեի (ՊԵԿ) նախագահ Դավիթ Անանյանը՝ անդրադառնալով Մոսկվայում հայ գործարարների հետ վարչապետ Նիկոլ Փաշինյանի հանդիպման ժամանակ ռուսաստանաբնակ հայտնի գործարար Ռուբեն Վարդանյանի հնչեցրած հայտարարություններին:
«Պետք է ասեմ, որ պարոն Վարդանյանի՝ Հարկային օրենսգրքի վերաբերյալ պատկերացումները կամ իմացությունը, երևի, այդքան էլ խորը չեն: Մենք ունենք 5 հարկատեսակ, ուղղակի մենք Հարկային օրենսգիրք ենք բերել բոլոր այն պարտադիր վճարները, տուրքերը, որոնք հարկ չեն կոչվել: Եվ քանի որ դրանք Հարկային օրենսգիրք ենք բերել, որպեսզի հարկային մարմինը վարչարարություն իրականացնի, դրանք արդեն կոչվում են ոչ թե վճարներ, այլ հարկեր: Սակայն ավանդական հարկերը մեզ մոտ 5-ն են»,- նշեց Դավիթ Անանյանը՝ թվարկելով դրանք. շահութահարկ, եկամտային հարկ, ԱԱՀ, ակցիզային հարկ, գույքահարկ:
ՊԵԿ ղեկավարը խորհուրդ է տալիս հարկային օրենսդրությունները համադրելը թողնել պրոֆեսիոնալներին: Ամեն դեպքում, Դավիթ Անանյանն ընդունում է, որ Վրաստանում հարկային օրենսդրությունն ավելի պարզեցված է, քան Հայաստանում: Այս ուղղությամբ արդեն աշխատում են: «Այո՛, Վրաստանում հարկային օրենսդրությունը շատ ավելի պարզ է, մենք երբեք չենք ասել, որ այդպես չի: Բայց այդ ուղղությամբ աշխատում ենք: Ասացի՝ կարճաժամկետ, միջնաժամկետ և երկարաժամկետ. մենք այս երեք փուլերով դեռ անելիքներ ունենք»,- հավելեց Անանյանը:
Հիշեցնենք, որ սեպտեմբերի 8-ին Մոսկվայում հայ գործարարների հետ ՀՀ վարչապետ Նիկոլ Փաշինյանի հանդիպմանը հայտնի գործարար Ռուբեն Վարդանյանը հետաքրքրվել էր, թե ինչ է արվում՝ Հայաստանում ներդրում անելը ձեռնտու դարձնելու համար: Գործարարը նաև հարևան երկրի օրինակն էր բերել՝ նշելով, որ Վրաստանում 6 հարկատեսակ է, Հայաստանում՝ 18:
