05.04.2026 | 21:21
Բախվել են VAZ և KIA մակնիշների ավտոմեքենաները․ կան տուժածներ և զոհ
Պուտինն ու Ալիևը կրկին Ադրբեջանի և Հայաստանի միջև խաղաղության պայմանագրի նախապատրաստման հարցն են քննարկել
Քաղաքականություն
28.08.2024 | 14:16
Ռուսաստանի և Ադրբեջանի նախագահներ Վլադիմիր Պուտինն ու Իլհամ Ալիևը հեռախոսազրույցում քննարկել են Ռուսաստանի ղեկավարի այցը Բաքու և Հայաստանի ու Ադրբեջանի միջև խաղաղության պայմանագրի նախապատրաստման հարցը, հաղորդում է Կրեմլի մամուլի ծառայությունը։
«Ղեկավարները գոհունակություն են հայտնել Ռուսաստանի նախագահի՝ վերջերս Ադրբեջան կատարած պետական այցի հաջող արդյունքների կապակցությամբ։ Նշվել է, որ բանակցությունների ընթացքում ձեռք բերված պայմանավորվածությունների հետևողական իրականացումը կնպաստի ռուս-ադրբեջանական դաշնակցային և գործընկերային հարաբերությունների հետագա խորացմանը»,- ասված է մամուլի հաղորդագրության մեջ։
Խոսելով Անդրկովկասում տիրող իրավիճակի մասին՝ զրուցակիցներն անդրադարձել են ադրբեջանա-հայկական հաշտության պայմանագրի նախապատրաստման, սահմանի սահմանազատման ու սահմանագծման, ինչպես նաև տրանսպորտային հաղորդակցությունների ապաշրջափակման հարցերին, նշվում է հաղորդագրությունում։
Պուտինը հաստատել է Մոսկվայի պատրաստակամությունը՝ շարունակելու աջակցել Բաքվին և Երևանին փոխադարձ ընդունելի լուծումներ մշակելու հարցում։
Հիշեցնենք՝ Ռուսաստանի ղեկավարը օգոստոսի 18-19-ը պետական այցով Ադրբեջանում էր։ Նա Ալիևի հետ բանակցություններ է վարել նեղ և ընդլայնված կազմերով, կողմերը ստորագրել են մի շարք փաստաթղթեր։
Օգոստոսի 23-ին էլ Պուտինը զանգահարել է Հայաստանի վարչապետ Նիկոլ Փաշինյանին, քննարկել Բաքվի և Երևանի միջև հարաբերությունների կարգավորման հարցը՝ ադրբեջանցի գործընկերոջ հետ հանդիպման լույսի ներքո։
