Փշալարերից դուրս․ Փարաջանովի մասին ֆիլմը Վենետիկի փառատոնում մեծ հաջողության է հասել․ ՏԵՍԱՆՅՈՒԹ

Հռչակավոր ռեժիսոր Սերգեյ Փարաջանովի մասին վավերագրական ֆիլմը մեծ հաջողություն է գրանցել՝ ընդգրկվելով Վենետիկի 81-րդ միջազգային կինոփառատոնի պաշտոնական ծրագրում, VENICE CLASSICS խմբի մրցութային բաժնում:

«Ես վրեժխնդիր կլինեմ աշխարհից սիրո միջոցով – Ս. Փարաջանով». այսպես է կոչվում հայ-ֆրանսիական համատեղ արտադրության ֆիլմը, որը հիմնված է իրական իրադարձությունների վրա և նվիրված է Փարաջանովի 100-ամյակին։

Իրադարձությունները սկսում են ծավալվել հեղինակի՝ ժամանակակից ռեժիսորի որոշումից՝ լքել այն երկիրը, որտեղ նա ապրում է, վերադառնալ Հայաստան՝ որոնելու լուծումներ, թե ինչպես շարունակել ապրել։ Փարաջանովի թանգարանը դառնում է ոգեշնչման վայր։

«Ֆիլմի մեսիջն այն է, տարբեր ժամանակներում կան աշխարհաքաղաքական խնդիրներ, բայց հատկապես արվեստի մարդը պետք է շարունակի իր գործն անել, ինչպես դա անում էր Փարաջանովը՝ նույնիսկ բանտում»,- ասում է ֆիլմի ռեժիսոր, պրոդյուսեր Զառա Ջյանը։

Փարաջանովի մասին ֆիլմն ընտրվել է շուրջ 15 հազար ֆիլմերից։ Նկարահանումները տեղի են ունեցել Հայաստանում, Լատվիայում, Գերմանիայում և Սերբիայում: Ֆիլմի հերոսների ցանկն էլ բաղկացած է միջազգային ճանաչում ունեցող արվեստի գործիչներից՝ Էմիր Կուստուրիցա, Արտավազդ Փելեշյան, Ատոմ Էգոյան, Թարսեմ Սինգխ, Չուլպան Խամատովա, Ջոել Կապրոն, Ալի Խամրայեվ, Լորա Գուերրա, Լևոն Աբրահամյան։ Հեղինակները շեշտում են՝ սա դասական կենսագրական ֆիլմ չէ, այն իսկապես միջազգային է՝ առանց խորհրդային հետքի, ինչը տեսանելի է մինչ այս նկարահանված Փարաջանովի մասին ֆիլմերում:

Հեղինակները նաև նշում են՝ քանի որ Փարաջանովն ինքը խորհրդային փշալարերից դուրս գործիչ էր, օրինաչափ է, որ նրան նվիրված ֆիլմը ևս պետք է այդպիսին լիներ: Ֆիլմում Փարաջանովը կարծես խոսում է հենց այսօրվա խնդիրների մասին։

Մանրամասները՝ տեսանյութում։

Աննա Բաբաջանյան