Թուրքիայում աղքատության շեմը չորս անգամ գերազանցում է նվազագույն աշխատավարձը

Թուրքիայում սովի շեմը հուլիսին, նախորդ ամսվա համեմատ, աճել է 202 թուրքական լիրայով և կազմել 20,776 լիրա (630 դոլար): Այս մասին են վկայում  Birleşik Kamu-İş արհմիությունների կոնֆեդերացիայի հետազոտության արդյունքները, գրում են թուրքական լրատվամիջոցները։

Սովի շեմը վերաբերում է ամսական սննդի ծախսի այն չափին, որը պետք է անի չորս հոգանոց ընտանիքը առողջ և հավասարակշռված սննդակարգ ունենալու համար։

Աղքատության շեմը, որը ցույց է տալիս սննդի և այլ ծախսերի ընդհանուր գումարը, որը չորս հոգանոց ընտանիքը պետք է ծախսի՝ առանց զրկանքի ապրելու համար, հուլիսին բարձրացել է 885 լիրայով և կազմել 62,302 լիրա (1,889 դոլար): Այս ցուցանիշը 3,7 անգամ գերազանցում է նվազագույն աշխատավարձը, որը կազմում է 17,002 լիրա (515 դոլար):

Կառավարությունը որոշել է չբարձրացնել նվազագույն աշխատավարձը 2024 թվականի առաջին կիսամյակում՝ դրամավարկային կոշտ քաղաքականության պայմաններում։ Վերջին 12 ամիսների ընթացքում սովի շեմն աճել է 8,056 լիրայով, իսկ աղքատության շեմը՝ 28,318 լիրայով։

Չորս հոգուց բաղկացած ընտանիքի համար պահանջվող ծախսերի գումարը, բացառությամբ՝ սննդի, նույնպես հուլիսին բարձրացել է մինչև 41,526 լիրայի (1,259 դոլար): Հուլիսին չորս հոգանոց ընտանիքի հագուստի և կոշիկի ծախսերը նվազել են մինչև 1945 լիրայի։ Բնակարանային ծախսերը, ներառյալ՝ վարձավճարը, բարձրացել են մինչև 9865 լիրա, կենցաղային ապրանքների ծախսերը՝ 5287 լիրա, իսկ առողջապահական ծախսերը՝ 1703 լիրա։

Թուրքիայի պետական ​​վիճակագրական ինստիտուտը (TÜİK) հունիսին հաղորդել էր, որ երկրում տարեկան գնաճը կազմել է 71,6 տոկոս, մինչդեռ գնաճի հետազոտական ​​անկախ ENAG խմբի գնահատմամբ՝ այդ ցուցանիշը կազմել է 113,08 տոկոս:

Էմմա Չոբանյան