24.06.2026 | 09:32
Երևանի «Սպանդարյան» գերեզմանատան մոտ քաղաքացին ընկել է ձորակը և արգելափակվել քարերի արանքում
Զախարովան արձագանքել է Իսրայելի ԱԳ նախարարի՝ «Էրդողանը գնում է Սադամ Հուսեյնի հետքերով» հայտարարությանը
Քաղաքականություն
29.07.2024 | 22:12
ՌԴ ԱԳՆ պաշտոնական ներկայացուցիչ Մարիա Զախարովան մեկնաբանել է Իսրայելի ԱԳ նախարար Իսրայել Կացի հայտարարությունը, որը Թուրքիայի նախագահ Ռեջեփ Թայիփ Էրդողանին համեմատել էր Իրաքի նախկին նախագահ Սադամ Հուսեյնի հետ, փոխանցում է ՏԱՍՍ-ը։
«Այն, ինչ ԱՄՆ-ի մեղքով տեղի է ունեցել Իրաքում, ամերիկյան արտաքին քաղաքականության բացարձակ չարիքի, նրա հանցավոր բնույթի և ապակառուցողական կողմնորոշման հոմանիշ է դարձել։ Արդյո՞ք իսրայելցի նախարարի այդ խոսքերը միջազգային նման գործունեության հավանություն չեն նշանակում»,- գրել է Զախարովան իր տելեգրամ-ալիքում։
Նա նշել է, թե Իրաքում տեղի է ունեցել «ԱՄՆ-ի, Մեծ Բրիտանիայի և ՆԱՏՕ-ի այլ երկրների, ինչպես նաև նրանց միացածների հարձակումը ինքնիշխան պետության վրա կեղծ պատրվակներով»:
«Մինչ այդ, ամերիկյան կառավարությունը համառորեն ստում էր և քարոզում Իրաքում զանգվածային ոչնչացման զենքի ենթադրյալ առկայության մասին։ Այնուհետև հետևել է արևմտյան երկրների կողմից Իրաքի անօրինական օկուպացիան, ինքնիշխան պետության օրինական առաջնորդի հանցավոր սպանությունը, խելագար մահապատիժների և հաշվեհարդարների շղթան պաշտոնյաների և քաղաքացիական անձանց նկատմամբ, ինչպես նաև երկար տարիներ իրաքյան պետականության նկատմամբ ծաղրանքը»,- գրել է Զախարովան՝ նշելով, թե «ոչ ոք նույնիսկ չի հաշվել, թե քանի խաղաղ բնակիչ է զոհվել՝ վկայակոչելով հարյուր հազարավոր և նույնիսկ մեկ միլիոն թվեր», և «իր երկրից վտարված իրաքցի զինվորականներն անցել են ընդհատակ և, ոչ առանց Արևմուտքի մասնակցության, վերածվել են ԻԼԻՊ-ի»։
Նշենք, որ ի պաստասխան Էրդողանի սպառնալիքների՝ Իսրայելի ԱԳ նախարար Իսրայել Կացը Թուրքիայի նախագահին համեմատել էր Սադամ Հուսեյնի հետ։
«Էրդողանը գնում է Սադամ Հուսեյնի հետքերով և սպառնում է հարձակվել Իսրայելի վրա։ Պարզապես թող հիշի, թե ինչ կատարվեց այնտեղ և ինչպես ավարտվեց»,- գրել էր Կացը X-ի իր միկրոբլոգում։
