Տնտեսություն
24.07.2024 | 11:35
Հայաստանում նոր միջուկային էներգաբլոկների կառուցման շրջանակներում իրականացվում են տեխնիկատնտեսական հետազոտություններ, այս մասին Factor.am-ի գրավոր հարցմանն ի պատասխան հայտնել են ՀՀ տարածքային կառավարման և զարգացման նախարարությունից։
Նախարարությանն ուղղված հարցմամբ հետաքրքրվել էինք, թե նոր ատոմակայանի կառուցման վերաբերյալ Հայաստանը ո՞ր երկրների հետ է բանակցում։
ՏԿԵ նախարարի տեղակալ Հովհաննես Վարդանյանը տեղեկացրել է, որ Հայաստանը բանակցում է մի շարք երկրների հետ՝ ԱՄՆ, Ռուսաստան, Կորեա, Չինաստան և Ֆրանսիա։
«Ամերիկյան հեղինակավոր ընկերություններից մեկը ԱՄՆ կառավարության պատվերով հայկական կողմի հետ համատեղ իրականացվում է տեխնիկատնտեսական հետազոտություն՝ ամերիկյան արտադրողների կողմից առաջարկվող փոքր մոդուլային տեխնոլոգիաների վերաբերյալ։ Հետազոտության նպատակն է բացահայտել, թե որ արտադրողի տեխնոլոգիան է առավելապես հարմար Հայաստանի կարիքների բարելավմանը»,- մանրամասնել են նախարարությունից։
Ըստ պատասխանի՝ այդ հետազատությունը նախատեսվում է ավարտել ամենաուշը մինչև հաջորդ տարի գարուն։
Հովհաննես Վարդանյանը նաև հավելել է, որ ներկայումս իրականացվում են նոր ատոմակայանի կառուցման վերաբերյալ տեխնիկատնտեսական հետազոտություններ, որոնք հնարավորություն կտան հասկանալ, թե Հայաստանի պարագայում ինչ տեխնոլոգիա և ինչպիսի կայանն առավել արդյունավետ և շահավետ կլինի։
Նշենք, որ վերջերս Անվտանգության խորհրդի քարտուղար Արմեն Գրիգորյանը հայտարարել էր, որ Հայաստանն ԱՄՆ-ի հետ առարկայական քննարկումների փուլում է նոր ատոմակայանի կառուցման հարցով։
ԱՄՆ ՄԶԳ ղեկավար Սամանթա Փաուերն իր հեթին Factor.am-ի հարցին ի պատասխան նշել էր, որ ՀՀ-ԱՄՆ ատոմակայանի համատեղ կառուցման հարցում հստակ ժամկետներ չկան։
Հիշեցնենք, որ տևական ժամանակ է՝ հայկական կողմը միջազգային տարբեր գործընկերների հետ քննարկում է նոր ատոմակայանի նախագծման, ռեակտորի տեսակի և հզորության վերաբերյալ հարցեր։ Մեծամորի ատոմակայանի շահագործման ժամկետը, ինչպես հայտնի է, երկարաձգվել է մինչև 2036 թվականը։
Գործադիրն էլ արդեն հավանություն է տվել «Հայաստանի Հանրապետության միջուկային անվտանգության կարգավորման կոմիտեի և Ամերիկայի Միացյալ Նահանգների միջուկային կարգավորող հանձնաժողովի միջև միջուկային անվտանգության հարցերով տեխնիկական տեղեկատվության փոխանակման և համագործակցության մասին» hամաձայնագիրը հաստատելու մասին» նախագծին։
Մանյա Պողոսյան
