01.11.2024 | 17:38
Փոխվարչապետ Տիգրան Խաչատրյանն ընդունել է Ֆրանսիայի Օվերնյ-Ռոն-Ալպեր շրջանի պատվիրակությանը
Բոբ Մենենդեսը հրաժարական է տալիս, որն ուժի մեջ կմտնի օգոստոսի 20-ին
Քաղաքականություն
24.07.2024 | 11:23
Ամերիկացի սենատոր Բոբ Մենենդեսը կաշառք վերցնելու, ինչպես նաև Եգիպտոսի կառավարության գործակալ լինելու համար մեղավոր ճանաչվելու դատավճռից հետո հրաժարական կտա, որն ուժի մեջ կմտնի օգոստոսի 20-ին: Այս մասին նա հայտնել է Նյու Ջերսիի նահանգապետին ուղղված նամակում, որի հետ ծանոթացել է նաև Associated Press-ը:
Հուլիսի 16-ի դատավճռից հետո Մենենդեսը պնդել էր, որ ինքը անմեղ է, և իր նամակում խոստացել է մինչև վերջ բողոքարկել դատավճիռը, ներառյալ Գերագույն դատարանի վճիռը:
Ըստ Դաշնային դատախազների՝ հայամետ սենատորը և նրա կինը՝ Նադին Մենենդեսը, երեք գործարարներից որպես կաշառք ընդունել են հարյուր հազարավոր դոլարի կանխիկ գումար, ոսկու ձուլակտորներ, ավտոմեքենաներ և հիփոթեքային վճարումներ: Դատախազների խոսքով՝ Մենենդեսը դրա դիմաց օգնել է հաստատել Եգիպտոսին միլիարդավոր դոլարների ԱՄՆ օգնություն:
Մենենդեսը մեղադրվում է նաև երկու այլ գործարարների՝ Ֆրեդ Դայբեսի և Խոսե Ուրիբեի դեմ քրեական հետաքննության ընթացքի վրա ազդելու փորձի մեջ։ Հանան և Դայբեսը դատավարության ժամանակ հանդես են եկել որպես համախոհներ: Ուրիբեն իրեն մեղավոր է ճանաչել և որպես վկա ցուցմունք տվել Մենենդեսի դեմ:
Բոբ Մենենդեսը հրաժարական է տվել Սենատի արտաքին հարաբերությունների հանձնաժողովի նախագահի պաշտոնից անցյալ տարվա սեպտեմբերին իրեն առաջադրված մեղադրանքներից հետո, սակայն դիմադրում էր դեմոկրատների՝ հրաժարական տալու կոչերին:
