22.11.2024 | 19:31
Լուկաշենկոն սպառնացել է «ամբողջությամբ ինտերնետը անջատել» բողոքի ակցիաների դեպքում
Հույն հայտնի երգչուհին Թուրքիայում հրաժարվել է ելույթ ունենալ թուրքական դրոշով ու Աթաթուրքի դիմանկարով զարդարված բեմում
Քաղաքականություն
19.07.2024 | 22:02
Հույն փոփ-աստղ Դեսպինա Վանդին հրաժարվել է ելույթ ունենալ Թուրքիայի դրոշով և երկրի հիմնադիր հոր`Աթաթուրքի դիմանկարով զարդարված բեմում, ինչի հետևանքով տեղի քաղաքապետը խնդրել է նրան հեռանալ իր քաղաքից, հայտնում են թուրքական լրատվամիջոցները, գրում է հունական kathimerini-ին։
Չորեքշաբթի ուշ երեկոյան 54-ամյա երգչուհին պետք է ելույթ ունենար բարեգործական համերգում Չեշմեում՝ Թուրքիայի Իզմիրից արևմուտք ընկած առողջարանային քաղաքում: Նա հրաժարվել է ներկայանալ այն բանից հետո, երբ իշխանությունները մերժել են Մուստաֆա Քեմալ Աթաթուրքի դրոշն ու պաստառը հանելու խնդրանքը։
Նկատենք, որ միջադեպը տեղի է ունենում այն ժամանակ, երբ Թուրքիայի և Հունաստանի առաջնորդները փորձում են բարելավել իրենց խարխուլ հարաբերությունները։
Ինստագրամի իր էջում գրառման մեջ Վանդին իր հարգանքն է հայտնել հանդիսատեսին, որոնք «պատվել են իր համերգին իրենց ներկայությամբ»։ Բայց նա քննադատել է կազմակերպիչներին` Թուրքիայի կրթական հիմնադրամին, միջոցառումը համերգից վերածելու համար «արգելված և չհամաձայնեցված քաղաքական ենթատեքստի»:
«Իմ մասնակցությունը նշված միջոցառմանը հնարավոր չէ»,- գրել է նա։
Հանդիսատեսը, որը լցրել էր Չեշմեի բացօթյա ամֆիթատրոնը, իր հիասթափությունն է արտահայտել, երբ հայտարարվել նրա չներկայանալու որոշման պատճառը։
«Չկա ոչ մի ուժ, որը կարող է ստիպել մեզ իջեցնել մեր դրոշը կամ Աթաթուրքի նկարը։ Մի՛ սուլեք նրան։ Այս տիկինը պետք է անհապաղ հեռանա քաղաքից»,- հայտարարել է Չեշմեի քաղաքապետ Լալ Դենիզլին։
