09.09.2026 | 19:47
Սեպտեմբերի 10-ից մինչև նոյեմբերի 1-ը փակ կլինի Կոմիտասի պողոտա-Դավիթ Անհաղթի փողոց ուղեանցի վերին հատվածը
Ուկրաինական պատերազմի մեկնարկից ի վեր ավելի քան 660 հազար մարդ լքել է ՌԴ-ն և չի վերադարձել․ հետազոտություն
Քաղաքականություն
16.07.2024 | 15:51
Ավելի քան 660 հազար մարդ լքել է Ռուսաստանը և դեռևս չի վերադարձել երկիր Ուկրաինայում լայնածավալ պատերազմի մեկնարկից հետո՝ մոբիլիզացիայից և այլախոհների նկատմամբ ճնշումների պայմաններում։ Այս մաիսն ասվում է The Bell-ի հետազոտության մեջ, որը ներկայացնում է Meduza-ն։
2022 թվականից ի վեր հեռացած ռուսաստանցիների շրջանում առաջատար երկրների թվում են առանց վիզայի ուղղությունները՝ Հայաստանը (110 հազար մարդ), Ղազախստանը (80 հազար), Վրաստանը (74 հազար): Ըստ The Bell-ի՝ Իսրայել է տեղափոխվել մոտ 80 հազար ռուսաստանցի, իսկ ԱՄՆ՝ մոտ 48 հազարը։
Միաժամանակ, ԱՄՆ-ում ռուսները զանգվածաբար դիմում են ապաստան ստանալու համար։ Եվրոպական երկրներից ռուսաստանցիներն ամենից հաճախ մեկնել են Գերմանիա (36 հազար մարդ), Լատվիա (18 հազար), Իսպանիա (16 հազար) և Նիդերլանդներ (12 հազար): Եվրամիությունից դուրս Սերբիան առաջատարն է Եվրոպայում՝ շուրջ 30 հազար մարդ է մեկնել այս երկիր։
Եվս մեկ հայտնի ուղղություն, ուր ռուսաստանցիները տեղափոխվել են 2022 թվականի սկզբից, Թուրքիան է։ Նշվում է, որ վերջին շրջանում ռուսները լքում են այս երկիրը՝ հիմնականում այն պատճառով, որ նրանց կեցության թույլտվությունները չեն երկարաձգվում, ինչպես նաև երկարատև տնտեսական ճգնաժամի պատճառով, քանի որ Թուրքիայում կյանքը թանկանում է։
Հայտնի չէ, թե ստույգ քանի ռուսաստանցի է լքել երկիրը Ուկրաինա ռուսական զորքերի լայնամասշտաբ ներխուժումից հետո։ Ռուսաստանի իշխանությունները պաշտոնապես տվյալներ չեն հրապարակում։
Ըստ The Bell-ի՝ չնայած Ռուսաստանի ընդհանուր բնակչության համեմատ հեռացածների փոքր համամասնությանը (0,5%)՝ ուկրաինական պատերազմի սկսվելուց հետո ռուսների արտագաղթը դարձել է ամենազանգվածայինը 20 տարվա ընթացքում։ Մինչ այս, ամենամեծ ալիքը համարվում էր 1992-ից 2004 թվականներն ընկած ժամանակահատվածը, երբ, ժողովրդագիրների տվյալներով, երկիրը լքել է 1,6 մլն մարդ։
