19.02.2026 | 15:02
Բագրատ արքեպիսկոպոս Գալստանյանի և մյուսների գործով դատական նիստը. ՈՒՂԻՂ
Խոշոր չափերի կանխիկ և չհայտարարագրված գույք․ ԿԿՀ-ն ուսումնասիրում է Առուշ Առուշանյանի և նրա ընտանիքի անդամների հայտարարագրերը՝ Factor․am-ի հարցման հիման վրա
Հասարակություն
15.07.2024 | 17:33
Գորիսի համայնքապետ Առուշ Առուշանյանը պաշտոնը ստանձնելուց ի վեր հայտարարագրում է խոշոր չափի կանխիկ գումար․ 2017 թվականի համար՝ 312,5 մլն ՀՀ դրամ, 420 հազար ԱՄՆ դոլար և 122 հազար եվրո, 2018-ին՝ 248,5 մլն դրամ, 406 հազար դոլար և 112 հազար եվրո, 2019 թվականին՝ 240 մլն դրամ, 380 հազար դոլար և 112 հազար եվրո, 2020-ին՝ 234 մլն դրամ, 300 հազար դոլար և 105 հազար եվրո, իսկ 2021-2023 թվականներին նրա հայտարարագրած կանխիկի չափն անփոփոխ է՝ 210 մլն դրամ, 300 հազար դոլար, 100 հազար եվրո։ Համայնքապետի բանկային հաշվին անցած տարեվերջին եղել է 268 հազար դրամ։
Առուշանյանի 2023 թվականի գույքի և եկամուտների հայտարարագրի համաձայն՝ նա Գորիսում ունի արտադրական նշանակության շինություն, 2 հողամաս և 2019 թվականին գնված շինություն, որը դեռ չի ստացել պետական գրանցում։ Նա 2016-ին գնել է 1930 թվականի արտադրության ZIL մակնիշի բեռնատար ավտոմեքենա։
Առուշանյանի եկամտի միակ աղբյուրը, ըստ հայտարարագրի, եղել է նրա աշխատավարձը Գորիսի համայնքապետարանի աշխատակազմից՝ մոտ 2,8 մլն դրամ։
Համայնքապետը որևէ կերպ չի նշել իր առնչությունը «Գոր Մետալ» ՍՊԸ-ին, որի 100%-ի սեփականատերն է։
Ի դեպ, Առուշանյանը 2019 թվականին Արսեն Բազունց Մագբեթից նվիրատվություն է ստացել հողամաս և նույն անձին նվիրել անհատական բնակելի տուն։ Վերջինը նախորդ տարիներին չի հայտարարագրել, բայց նվիրատվությունից հետո տարվա վերջին գույքի առկայություն է նշել։ Այս գործարքի հիմնավորման, խոշոր չափի կանխիկի ծագման աղբյուրի և օրինականության, «Գոր մետալ» ՍՊԸ-ի վերաբերյալ Factor․am-ը գրավոր հարցում է ուղարկել Կոռուպցիայի կանխարգելման հանձնաժողով։
ԿԿՀ-ից հայտնել են, որ հանձնաժողովն ուսումնասիրել է անձի վերաբերյալ ԶԼՄ-ների հրապարակումները, ինչպես նաև մեր հարցման մեջ նշվածը և որոշել է իրականացնել Առուշ Առուշանյանի և նրա ընտանիքի անդամների կողմից ներկայացված հայտարարագրերի վերլուծություն:
Գայանե Խաչատրյան
