10.12.2025 | 23:29
ԱՄՆ Կոնգրես է ներկայացվել 907 ուղղումն ամբողջությամբ չեղյալ համարելու մասին օրինագիծ
Ռազմավարական գործընկերության հռչակագրի ստորագրմամբ հայ-վրացական համագործակցությունը նոր մակարդակի է հասել․ Վրաստանի ԱԳ նախարար
Քաղաքականություն
03.07.2024 | 14:55
Վրաստանին և Հայաստանին կապում են առանձնահատուկ բարեկամությունն ու բարիդրացիությունը, որոնք դարերի պատմություն ունեն, և վստահ եմ, որ Հայաստանի ԱԳ նախարարի այսօրվա այցը նոր լիցք կհաղորդի մեր հարաբերություններին։ Այս մասին հայտարարել է Վրաստանի արտաքին գործերի նախարար Իլյա Դարչիաշվիլին ՀՀ ԱԳ նախարար Արարատ Միրզոյանի հետ համատեղ ճեպազրույցում։
Նա հայտարարել է, որ ռազմավարական գործընկերության հռչակագրի ստորագրմամբ հայ-վրացական երկկողմ համագործակցությունը որակապես նոր մակարդակի է հասել։
«Հարկ է նշել, որ ռազմավարական գործընկերության հռչակագրի ստորագրմամբ մեր երկկողմ համագործակցությունը տեղափոխվել է որակապես նոր մակարդակ, նոր փուլը շրջադարձային է մեր բազմակողմ համագործակցության մեջ։ Այսօրվա հանդիպմանը ես ևս մեկ անգամ շնորհակալություն հայտնեցի իմ գործընկերոջը ՄԱԿ-ի բանաձևին պատմական աջակցության համար»,- ասել է Դարչիաշվիլին։
Վրաց պաշտոնյան նշել է, որ հանդիպմանը քննարկվել են երկու երկրների քաղաքական և տնտեսական համագործակցությունը, ինչպես նաև տարածաշրջանային գործընթացները։
«Վրաստանը և Հայաստանը վճռականորեն աջակցում և հարգում են միմյանց տարածքային ամբողջականությունն ու ինքնիշխանությունը։ Մենք խոսեցինք մեր երկրների միջև ինտենսիվ բազմակողմ համագործակցության մասին։ Հայաստանը Վրաստանի առևտրային գործընկերների տասնյակում է, իսկ զբոսաշրջության առումով՝ եռյակում։ Այս հարցերի շուրջ մենք քննարկել ենք տարբեր ուղղություններ, և վստահ եմ, որ մեր միջև տնտեսական համագործակցությունն է՛լ ավելի կամրապնդվի։ Խոսել ենք տարածաշրջանում առկա գործընթացների, առկա մարտահրավերների ու հնարավորությունների մասին, ընդգծել մեր համատեղ ջանքերի կարևորությունը այդ մարտահրավերներին դիմակայելու գործընթացում։ Վրաստանը հաստատակամորեն աջակցում է Հարավային Կովկասում կայունությանն ու խաղաղ գոյակցությանը»,- ասել է նա։
Դարչիաշվիլին հույս է հայտնել, որ Հայաստանի և Ադրբեջանի միջև խաղաղության համաձայնագրի գործընթացը կպահպանի դրական դինամիկան։
«Մենք պատրաստ ենք մեր հարևանների կարիքների և մեր հնարավորությունների սահմաններում շարունակել նպաստել կառուցողական երկխոսության խթանմանը և տարածաշրջանում կայունության ու խաղաղության ապահովմանը։ Մենք ողջունում ենք Հայաստանի և Ադրբեջանի միջև խաղաղ ճանապարհով ձեռք բերված պատմական որոշումը՝ սկսելու պետական սահմանի սահմանազատման գործընթացը։ Հուսով եմ, որ Հայաստանի և Ադրբեջանի միջև խաղաղ համաձայնագրի գործընթացը կպահպանի դրական դինամիկա»,- ասել է Դարչիաշվիլին։
