Չկա քաղաքային երազ, կա ներդրողի պահանջ, մինչև հիմա սա են բավարարել մեր իշխանությունները. ճարտարապետ․ ՏԵՍԱՆՅՈՒԹ

«Եթե Երևանի գլխավոր հատակագիծը սեղմ ժամկետներում մշակվի, այն կարող է տուժել: Ինձ մոտ տպավորություն է, որ մասնագետները, որոնք աշխատում են հատակագծի շուրջ, չունեն ստրատեգիա, չեն հասկանում, թե Երևանին ինչ է պետք: Այդ դեպքում մենք թերի փաստաթուղթ ենք ունենալու, չի լինելու այն, ինչ պետք է և սպասումը, որ կարող է ինչ-որ բան շտկվել, չի արդարանալու»,-Factor TV-ի հետ զրույցում նշում է «Փարիզ-էստ» համալսարանի քաղաքաշինության դոկտոր, ճարտարապետ Մարիամ Խաչատրյանը` անդրադառնալով վարչապետ Նիկոլ Փաշինյանի կողմից ստորագրված նախագծին, որի հիման վրա պետք է մշակվի ու հաստատվի Երևանի գլխավոր հատակագիծը, և սա այն դեպքում, որ դա պետք է իրականացված լիներ մինչև 2020 թվականը:

Ճարտարապետը շեշտում է`գլխավոր հատակագիծը պետք է ռեալ լինի և չպետք է մշակվի միայն երազանքների ու ինչ-որ մարդկանց պատկերացումների, ցանկությունների հիման վրա. «Մինչև հիմա մեր քաղաքային իշխանություններն իրականացրել են ոչ թե քաղաքի, այլ ներդրողի երազը, նրանց պահանջները: 20 տարի առաջ էլ, երբ մշակվում էր Երևանի գլխավոր հատակագիծը, քաղաքային իշխանությունը խոստացավ բարելավել քաղաքի էկոհամակարգը, ապահովել հուշարձանների պահպանությունը, բայց հետո խոստումը չպահեց ու իր սև գործն արեց: Հիմա էլ կարող է նույնը լինել»:

Մարիամ Խաչատրյանը նշում է` տպավորություն է, թե քաղաքային կառավարումը Երևանում ինքնահոսի է թողնված, և որևէ մեկը չի հաշվարկում մեր ռեսուրսներն ու հնարավորությունները, ըստ նրա` չկա նաև երկխոսություն քաղաքային իշխանության, հանրության և մասնագետների միջև. «Երևանն այսօր ճանապարհների խնդիր ունի, փակուղիները, որոնք մեծ թիվ են կազմում, պետք է բացվեն գոնե այնտեղ, որտեղ հնարավոր է, բայց դա չի արվում»:

Մանրամասները`տեսանյութում:
Աննա Բաբաջանյան