ԱՄՆ-ը նախազգուշացնում է, որ Իսրայելի հարձակումը Լիբանանի վրա կարող է հանգեցնել Իրանի ռազմական պատասխանի

Ամերիկացի բարձրաստիճան զինվորականը նախազգուշացրել է, որ Իսրայելի ցանկացած ռազմական հարձակում Լիբանանում կարող է հանգեցնել Իրանի պատասխանի՝ ի պաշտպանություն լիբանանյան «Հըզբոլլահ» շարժման, ինչը կարող է ավելի լայն պատերազմ առաջացնել և վտանգի տակ դնել ԱՄՆ ուժերին տարածաշրջանում, գրում է Frаnce 24-ը։

ԱՄՆ Զինված ուժերի շտաբի պետերի միացյալ կոմիտեի նախագահ, ռազմաօդային ուժերի գեներալ  Չարլզ Բրաունն ասել է, որ Իրանն «ավելի հակված կլինի աջակցել «Հըզբոլլահ»-ին»: Նա հավելել է, որ Թեհրանն աջակցում է ՀԱՄԱՍ-ին, սակայն ավելի մեծ աջակցություն կցուցաբերի «Հըզբոլլահ»-ին, հատկապես, «եթե նրանք զգան, որ «Հըզբոլլահ»-ին էականորեն սպառնում են»:

Իսրայելի պաշտոնյաները սպառնում են ռազմական հարձակման իրականացնել Լիբանանում, եթե բանակցությունների ավարտը չհասնի «Հըզբոլլահ»-ին սահմանից հեռացնելուն։ Ընդամենը օրեր առաջ իսրայելական բանակը հայտարարել էր, որ հաստատել է հարձակման ծրագրերը Լիբանանում, մինչդեռ ԱՄՆ-ն աշխատում է կանխել ամիսներ շարունակվող անդրսահմանային հարձակումները լայնամասշտաբ պատերազմի վերածվելը:

Բրաունը նաև ասել է, որ ԱՄՆ-ը, ամենայն հավանականությամբ, չի կարողանա օգնել Իսրայելին՝ պաշտպանվելու «Հըզբոլլահ»-ի հետ ավելի լայնածավալ պատերազմից, ինչպես նաև օգնել Իսրայելին հետ մղել Իրանի կողմից ապրիլին արձակված հրթիռների և անօդաչու թռչող սարքերի պատնեշը: Նա նշել է, որ ավելի դժվար է հակազդել կարճ հեռահարության հրթիռներին, որոնք «Հըզբոլլահ»-ը պարբերաբար արձակում է Իսրայելի հետ սահմանին։