24.05.2026 | 01:30
«SOAD-ը Երևանու՞մ». Սերժ Թանկյանը հայտարարել է՝ հուլիսին համերգ չի լինի
Շանթ Հարությունյանը կարող է ազատ արձակվել ցանկացած պահի, երբ համաձայնի ստորագրել անհրաժեշտ փաստաթղթերը. վարչապետի խոսնակ
Հասարակություն
31.08.2018 | 10:32
ՀՀ վարչապետի մամուլի խոսնակ Արման Եղոյանը պատասխանել է Շանթ Հարությունյանի որդու՝ Շահեն Հարությունյանի երեկվա ուղիղ եթերի ժամանակ հնչած նախազգուշացումներին, որով սպառնացել է իշխանություններին՝ դուրս գալ ու խաղաղ անհնազանդություն իրականացնել, եթե մինչև իր կողմից նշված ժամանակը չլուծվի Շանթ Հարությունյանի ազատ արձակման հարցը:
Պարզաբանումը՝ ստորև.
Շանթ Հարությունյանի՝ բանտում գտնվելու հետ կապված հարկ եմ համարում ընդգծել.
- Վարչապետ ընտրվելու հենց առաջին օրերից Նիկոլ Փաշինյանը զբաղվել է այդ հարցով եւ պարզել, որ Շանթ Հարությունյանի եւ խմբի ազատ արձակելու հարցում կառավարության ունեցած միակ օրինական լծակը կալանքի ռեժիմը փոխելն է:
- Կայացվել է որոշում Շանթ Հարությունյանի, նրա գործով դատապարտված Վարդան Վարդանյանի եւ Լիպարիտ Պետրոսյանի պահման պայմանները փոխել կիսաբացից բաց ռեժիմի, այնպես, որ նրանք փաստացի լինեն ազատության մեջ, ինչից օգտվել են Վարդան Վարդանյանը եւ Լիպարիտ Պետրոսյանը:
- Շանթ Հարությունյանը հրաժարվել է նման որոշմամբ դուրս գալ բանտից՝ պահանջելով իրեն արդարացնել:
- Վարչապետը դրանից հետո խնդրել է Շանթ Հարությունյանին հրավիրել «Վարդաշեն» քրեակատարողական հիմնարկի պետի աշխատասենյակ եւ հեռախոսազրույց է ունեցել նրա հետ, պարզաբանելով, որ ինքն իրեն չի կարող թույլ տալ դատարաններին հրահանգ արձակել, որովհետեւ դա կլինի նախորդ իշխանության գործելակերպի շարունակություն, եւ Շանթ Հարությունյանին խնդրել է ստորագրել փաստաթղթերը եւ դուրս գալ բանտից, եւ ազատության պայմաններում պայքարել իր արդարացման համար:
- Վարչապետը ընդունել է նաեւ Շանթ Հարությունյանի որդուն՝ Շահեն Հարությունյանին եւ պարզաբանել, որ նաեւ ինքը՝ Նիկոլ Փաշինյանը մինչեւ օրս համարվում է դատապարտված (հանցավոր արարք թույլ տված) 2008 թվականի մարտի 1-ի գործով, շարունակում է պայքարել իր արդարացման համար, բայց նաեւ համոզված է, որ այս գործընթացը պետք է տեղի ունենա ոչ թե քաղաքական հրահանգներով, այլ օրինականության խստիվ պահպանմամբ:
- Շանթ Հարությունյանը կարող է ազատ արձակվել ցանկացած պահի, երբ համաձայնի ստորագրել պահպան ռեժիմը փոխելու համար անհրաժեշտ փաստաթղթերը:
Նշենք, որ երեկ, ֆեյսբուքյան ուղիղ եթերում Շանթ Հարությունյանի որդին՝ Շահենը Հարությունյանը, նշել էր, որ յուրաքանչյուր կալանավոր պետք է զգա հեղափոխության շունչը: Նրա խոսքով, պատգամավոր եղած ժամանակ Նիկոլ Փաշինյանը Շանթ Հարությունյանին քաղաքական բանտարկյալ է համարել, իսկ հիմա չի զբաղվում կարևոր այդ հարցերով:
«Ես սպառնում եմ իշխանություններին՝ դուրս գալ եւ խաղաղ անհնազանդություն իրականացնել, հետո հանկարծ Նիկոլը չկանգնի ուղիղ եթերի ժամանակ, ասի՝ դա սաբոտաժ է մեր դեմ»,- նշել է Շահեն Հարությունյանը՝ ժամանակ տալով Նիկոլ Փաշինյանին զբաղվելու իր հոր հարցով մինչև նոյեմբերի 7-ը հակառակ դեպքում Ֆրանկոֆոնիայի գագաթնաժողովին ինքն անհնազանդություն կիրականացնի ու հոր քաղբանտարկյալ լինելու մասին կհայտարարի Ֆրանսիայի նախագահ Մակրոնի ու մյուս ղեկավարների մոտ:
Հիշեցնենք, որ Շանթ Հարությունյանը 2013թ. նոյեմբերի 5-ին «Անոնիմուսների երթ» էր նախաձեռնել։ Սակայն Մաշտոցի պողոտայում տեղի էին ունեցել բախումներ, ոստիկանները բերման էին ենթարկել 38 ակտիվիստի, ձերբակալել 14-ին: Նրանց առաջադրվել էր խուլիգանության մեղադրանք:
