Նվաստացուցիչ է՝ Գալստանյանը ՌԴ-ին դիմեց․ քիչ մնաց ասի՝ ռուսական դեսանտ իջեցրեք իշխանությանը հեռացնենք․ ՏԵՍԱՆՅՈՒԹ

ԱԺ ընդդիմադիր «Հայաստան» և «Պատիվ ունեմ» խմբակացություններն այսօր միջնորդություն ներկայացրեցին Ազգային ժողովի խորհրդին՝ վաղը կամ մինչև հունիսի 17-ն արտահերթ նիստ գումարելու պահանջով՝ Ազգային ժողովի ուղերձը կառավարության հրաժարականի և նոր կառավարության ձևավորման մասին օրակարգով։ Եթե այն մերժվի, օրենքի ուժով կգումարվի նիստ՝ հունիսի 17-ին 18։30-ին։

Բագրատ Գալստանյանի ընդդիմադիր շարժումը ԱԺ-ին հարող տարածքում՝ Բաղրամյան-Դեմիրճյան հատվածում վրաններ է տեղադրել։ «Մեր պահանջը մնում է հրաժարականը՝ չբացառելով քաղաքական լուծումների մնացած տարբերակները», – ասաց Բագրատ արքեպիսկոպոս Գալստանյանը` չմանրամասնելով, սակայն, թե կոնկրետ ինչ քաղաքական լուծումներ նկատի ունի։ Այն հարցին՝ քաղաքական այլ լուծումներ և՞ս պատրաստ են քննարկել, արդյո՞ք խոսքը նաև արտահերթ խորհրդարանական ընտրությունների մասին է, երբ չի բացառում «քաղաքական լուծումների մնացած տարբերակները», Բագրատ Գալստանյանն արձագանքեց՝ այդ թվում դա։

ՀՀ ԱԺ «Քաղաքացիական պայմանագիր» խմբակցության պատգամավոր Արսեն Թորոսյանը Factor TV-ի հետ զրույցում պնդում է, որ Գալստանյանը խաբում է իր հետևորդներին այս գործընթացով․ «Սա տապալված օրակարգ է, քանի որ Ազգային ժողովը Կառավարության հրաժարականի ինստիտուտ չունի։ Կա վարչապետի իմփիչմենթի ինստիտուտ, որի համար պետք է հավաքել անհրաժեշտ թվով ստորագրություններ, որոնք իրենք չունեն, և այդ մասին իրենք գիտեն շատ վաղուց։ Սա կեղծիք է և սուտ է իրենց հետևորդներին»,- նշեց ՔՊ-ական պատգամավորը։

Բագրատ Գալստանյանը եռալեզու դիմել է արտաքին ուժերին, իսկ մասնավորապես ռուսերենով ասել է հետևյալը․ «Մենք պահանջում են իշխանության հրաժարականը։ Մենք չենք խաթարելու դաշնակցային հարաբերությունները։ Սպասում ենք մեր գործընկերների ադեկվատ արձագանքը՝ տեղի ունեցող գործընթացներին»։ Ինչքանո՞վ է սահմանադրական այս կոչը, հարց ուղղեցինք Արսեն Թորոսյանին․

«Գալստանյանը քիչ է մնում ասեր՝ ռուսական դեսանտ ենք պահանջում Հայաստանի իշխանությունը հեռացնելու համար։ Այս մարդիկ դեմ են պետականությանը։ Ես համարում եմ՝ նվաստացուցիչ է, որ Հայաստանից այսպիսի հայտարարություն է գնում»,- ասաց Թորոսյանը։ Իշխանական պատգամավորը նաև պնդեց, որ ՌԴ-ն միջամտում է ՀՀ ներքին գործերին։

Հարցազրույցն ամբողջությամբ՝ տեսանյութում։

Ռոբերտ Անանյան