Միտումնավոր քանդում են հայ թատրոնը`վերացնելով գեղղեկավարի հաստիքը. Հակոբ Ղազանչյան. ՏԵՍԱՆՅՈՒԹ

«Սոցցանցերում ատելության այս ալիքը սարսափելի է, ատելության խոսք տարածողները դա անում են այնպիսի մի էյֆորիայով, որ հասկանում ես` մենք վրիպեցինք կրթության մեջ: Քանի մենք թքած ունենք կրթության վրա, մթնոլորտն ավելի է սրվելու:»,-Factor TV-ի հետ զրույցում նշում է Հ.Պարոնյանի անվան երաժշտական կոմեդիայի պետական թատրոնի գեղարվեստական ղեկավար, Հայաստանի թատերական գործիչների միության նախագահ Հակոբ Ղազանչյանը:
Նա խոսում է նաև հայ թատրոնի ներկայիս վիճակից, այն մասին, որ մեզ պարզապես անհրաժեշտ է «Թատրոնի մասին» օրենքը, որը 20 տարի շարունակ չարչրկվելուց հետո, միևնույն է, մնում է ինչ-որ մեկի դարակում. «Մեր թատրոններով զբաղվում են ինչ-որ «կիսաանտեսանելի ուժեր, որոնց օրենք պետք չէ: Օրենքի նախագծի վերամշակված տարբերակը կա: Չե´ն կարող, ասենք, կենդանաբանական այգին և թատրոնը նույն կերպ կառավարվել, մեզ օրենք է պետք»:
Հակոբ Ղազանչյանը նաև տեղեկացնում է, որ լրջորեն խոսվում է մեր թատրոններում գեղարվեստական ղեկավարների հաստիքները հանելու մասին. «Այդ շշուկները վաղուց կային: Նպատակային քանդում են թատրոնը: Լավ, դուք չեք ուզո՞ւմ, որ թատրոնն իր դեմքը, խաղացանկային քաղաքականությունն ունենա: Եթե թատրոններում գեղղեկավարներ չլինեն, այդ կառույցները կքանդվեն: Կբեմադրվեն միայն կոմերցիոն ներկայացումներ, կատակերգություններ, դահլիճները կլցվեն, բոլորը կծափահարեն, կասեն` այ, տեսեք, այսքան միլիոն աշխատեցինք, բայց երբ գա որևէ փառատոնի ներկայացում տանելու ժամանակը, ոչ մի բան չեն գտնի, որ տանեն»:

Մանրամասները`տեսանյութում:

Աննա Բաբաջանյան